Двухпавярхоўкі ў Мікалаеве пафарбаваны
У ліпені падчас правядзення старшынёй райвыканкама Сяргеем Галынчыкам выязнога прыёму ў Мікалаеве жыхарка вёскі ад імя жыхароў шматкватэрных дамоў па вуліцы Маладзёжнай прасіла пафарбаваць дамы. Маўляў, панэльныя шматпавярхоўкі з’яўляюцца амаль уязнымі варотамі ў раён, а выгляд маюць не зусім самавіты і прэзентабельны. Летась падчас падрыхтоўкі раёна да «Дажынак» сродкаў хапіла толькі на рамонт панэльных швоў.
Кіраўнік раёна згадзіўся з заўвагай і паабяцаў вырашыць пытанне. Даручэнне шукаць сродкі, рыхтаваць неабходныя дакументы і пачынаць фарбаваць дамы хаця б паэтапна Сяргей Аляксандравіч даў дырэктару УП ЖКГ Шумілінскага раёна Аляксею Шпакаву.
Напрыканцы кастрычніка работнікі раённай камунальнай службы закончылі бягучы рамонт дамоў у Мікалаеве і адрапартавалі аб праведзенай рабоце. Усе тры дамы пафарбаваны і выглядаюць як новенькія. Жыхары задаволены.
Алена КАРПУШЭНКА.