Падмурак будучых вялікіх перамог
11-12 лістапада ў Обальскай СШ прайшоў традыцыйны абласны турнір па грэка-рымскай барацьбе, прысвечаны памяці Обальскай падпольнай камсамольскай арганізацыі «Юныя мсціўцы».
Турнір у Обалі мае больш чым саракагадовую гісторыю. Для гарадскога пасёлка, як і для нашага раёна, гэта знакавая падзея, якую з нецярпеннем чакаюць. Для многіх барцоў-класікаў гэта пачатак спартыўнай кар’еры, і кожныя старты ў Обалі – пачатак новай гісторыі для юных зорак грэка-рымскай барацьбы. Для спартыўных заўзятараў гэта цудоўная магчымасць сустрэцца з сябрамі і разам перажыць перамогі і няўдачы спартсменаў, атрымаць вялікую дозу адрэналіну і станоўчых эмоцый.
На ўрачыстым адкрыцці спаборніцтваў прысутнічалі галоўны спецыяліст райвыканкама Дзмітрый Дубоўскі, дырэктар Шумілінскай СДЮШАР Алег Асташонак, першы намеснік начальніка РАУС Вячаслаў Воранаў, трэнеры, суддзі, вучні Обальскай СШ, шматлікія госці і балельшчыкі. Парад удзельнікаў аб’яднаў больш чым 150 спартсменаў з Обалі і Шуміліна, Віцебска і Глыбокага, Сянно і Талачына, Жлобіна.
– Гэта турнір, які добра ведаюць прыхільнікі грэка-рымскай барацьбы, – сказаў галоўны суддзя турніру Віталь Лукацэнка. – Сам сюды прыязджаю, відаць, гадоў сорак. І кожны турнір адметны і асаблівы, але заўсёды праходзіць у сяброўскай атмасферы, якая ёсць толькі тут, у Обалі.
І закруціўся віхор спаборніцтваў. Сёлета паядынкі праходзілі на двух барцоўскіх дыванах. Схватка за схваткай, радасць перамогі і слёзы паражэння, падказкі трэнераў і падтрымка гледачоў (а іх сёлета было як ніколі шмат) – пры такім антуражы лёгка, але і адказна было выступаць юным барцам.
«На турнір у Обаль прыехалі ўпершыню, – расказвае трэнер каманды са Жлобіна Уладзіслаў Кавалёў. – Узровень вельмі добры. Пытанняў да арганізацыі спаборніцтваў няма ніякіх. Рады, што ўсе трое маіх выхаванцаў трапілі на прызавыя месцы».
Самыя шматлікія каманды на турніры – обальская і шумілінская. Трэнеры Пётр Ганушчанка і Юрый Сцяпанаў выставілі па 16 барцоў. «Хочацца, каб юны спартсмен адчуў атмасферу спаборніцтваў у родных сценах пры падтрымцы сваякоў, знаёмых, – адзначыў Пётр Ганушчанка. – Паверце, гэта вельмі складана, бо ўсе чакаюць толькі перамогі».
Обальскія барцы не падвялі свайго трэнера: 13 абальчан сталі прызёрамі. Першыя месцы заваявалі Ян Лугаўскі, Яўген Ліпчанка і Аляксандр Юсупаў, другія – Ягор Барсукоў, Анатоль Зянькоў, Анатоль Анцупаў і Дзямід Купрыянаў, трэція – Арцём Кляцкоў, Антон Пінькоўскі, Аляксандр Аксёнаў, Захар Буторын, Вадзім Купчанка і Данііл Кляцкоў.
«Канечне, вынікамі не задаволены. Толькі два прызавыя месцы: у Ягора Заўялава – другое і ў Уладзіслава Стральцова – трэцяе, – расказвае Юрый Сцяпанаў. – Перад кожным ставіў задачу паказаць тое, чаму вучыліся на трэніроўках. На жаль, атрымалася не ва ўсіх. Затое ёсць канкрэтная база, над чым будзем працаваць на трэніроўках». Трэнер адзначыў і выступленне дэбютанта спаборніцтваў Аляксандра Рыбалкі як вельмі годнае, юны барэц на турніры «ўзяў» дзве перамогі, якіх, праўда, не хапіла для прызавога месца.
На закрыцці спаборніцтваў пераможцы і прызёры атрымалі медалі і дыпломы.
Аляксандр ШЭДЗЬКО.
