Дзе вучаць на міліцыянера?
Сённяшнія выпускнікі падчас сустрэч з супрацоўнікамі РАУС у школах раёна цікавяцца, дзе можна вывучыцца на міліцыянера.
«У Беларусі ёсць дзве навучальныя ўстановы – Акадэмія Міністэрства ўнутраных спраў Рэспублікі Беларусь у Мінску і Магілёўскі інстытут МУС Рэспублікі Беларусь, якія рыхтуюць спецыялістаў з вышэйшай адукацыяй, – расказаў намеснік начальніка РАУС Аляксандр Шумінскі. – У склад Акадэміі ўваходзяць факультэт крымінальнай міліцыі са спецыяльнасцямі «правазнаўства» і «эканамічнае права», факультэт міліцыі грамадскай бяспекі са спецыяльнасцю «правазнаўства». Магілёўскі інстытут МУС прапаноўвае абітурыентам атрымаць вышэйшую юрыдычную адукацыю па спецыяльнасцях «прававое забеспячэнне адміністрацыйна-прававой дзейнасці» і «прававое забеспячэнне аператыўна-вышуковай дзейнасці». Тэрмін навучання ў абедзвюх установах – 4 гады».
Абітурыенты, якія паступаюць на дзённую форму навучання, здаюць тры ўступныя іспыты ў форме адзінага экзамену (або ЦТ) па беларускай або рускай мове (на выбар), замежнай мове, грамадазнаўстве.
Аляксандр Шумінскі назваў сем прычын паступіць ва ўстановы МУС Рэспублікі Беларусь:
- Курсанты забяспечваюцца бясплатным жыллём, харчаваннем і абмундзіраваннем.
- Добрая стыпендыя (мінімальная– каля 350 рублёў).
- Час вучобы залічваецца ў выслугу гадоў.
- Гарантаванае працаўладкаванне і дастойны заробак.
- Дзяржстрахаванне супрацоўнікаў ад рознага роду рызыкі за кошт сродкаў рэспубліканскага бюджэту.
- Пенсійнае забеспячэнне па дасягненні 48-гадовага ўзросту з улікам выслугі на службе 20 і больш гадоў, а таксама з улікам стажу работы 25 і больш гадоў, з якіх не менш за 12,5 года складае служба ў органах унутраных спраў.
- Бясплатнае медабслугоўванне ў арганізацыях аховы здароўя органаў унутраных спраў як супрацоўнікаў, так і іх сем’яў.
Па ўсіх пытаннях паступлення трэба звяртацца ў групу кадраў РАУС (г. п. Шуміліна, вул. Вакзальная, 1а, каб. 11 або 3, тэл. 5-51-87, 5-51-95).
Людміла ЗУЙКОВА.
