На які заробак разлічваць механізатару?
Механізатараў, хто ўвесь светлавы дзень праводзіць на полі, хто працуе без выхадных, несумненна, хвалюе пытанне, на які заробак можна разлічваць. У гэтым годзе на перыяд пасяўной спецыялісты райсельгасхарчу зрабілі разлікі з улікам новых умоў аплаты працы. Калі раней за выкананне плану былі адны расцэнкі, за перавыкананне – другія, то сёлета ўведзена адна комплексная расцэнка.
Па-першае, яна значна лягчэйшая для разліку, па-другое, выгадная для сельскіх працаўнікоў.
“Мы рабілі разлікі для розных марак трактароў і сеялак, – расказвае галоўны спецыяліст райсельгасхарчу А. В. Плаксіна. – Напрыклад, для механізатара на трактары МТЗ-3022 з сеялкай АПП-6 за 25 гектараў сяўбы добрай якасці па новых умовах расцэнкі працы плаціцца 165 тысяч рублёў, а раней было 143 тысячы рублёў. Механізатару на трактары МТЗ-1221 з культыватарам КЧ-5,1 за 18 апрацаваных гектараў пры новых умовах працы заплацяць 115 тысяч рублёў (ранейшыя расцэнкі – 93 тысячы рублёў). Абавязковая ўмова – добрая якасць. А калі яна здавальняючая, то за культывацыю гэтых жа гектараў заплацяць толькі 34 тысячы рублёў”.
Як бачым, новыя расцэнкі працы заахвочваюць механізатараў павышаць прадукцыйнасць і якасць працы.
Ларыса ЗАЙЦАВА.
Надрукавана ў №29 ад 10.04.2012 г.
Суббота, 20.04.2024
