За мінулы тыдзень у раённы аддзел унутраных спраў паступіла 79 паведамленняў і заяў, расказаў намеснік начальніка РАУС Аляксандр Шумінскі.
Раённым аддзелам Следчага камітэта і пракуратурай раёна ўзбуджаны 3 крымінальныя справы, 2 з іх раскрыты.
За тыдзень выяўлена 18 адміністрацыйных правапарушэнняў, 9 з якіх — за знаходжанне ў стане алкагольнага ап’янення ў грамадскім месцы, 3 — за дамашняе насілле.
Праведзена адпрацоўка 18 асоб, якія былі раней судзімыя. Складзены тры пратаколы за парушэнне патрабаванняў прэвентыўнага нагляду.
У лячэбна-працоўны прафілакторый накіравана адна асоба, яшчэ пяць праходзяць медыцынскую камісію.
У жыхара раёна канфіскавана 40 літраў брагі і адзін самагонны апарат.
Зарэгістравана адно дарожна-транспартнае здарэнне, людзі не пацярпелі.
Супрацоўнікамі Дзяржаўтаінспекцыі выяўлена 80 парушэнняў Правілаў дарожнага руху. Двое вадзіцеляў кіравалі транспартнымі сродкамі ў стане алкагольнага ап’янення, 5 — без правоў, 3 — з непрышпіленымі рамянямі бяспекі, 7 — перавысілі хуткасць больш як на 20 кіламетраў у гадзіну. Правілы дарожнага руху парушылі тры пешаходы.
Крадзеж У раённы аддзел унутраных спраў звярнуўся жыхар Обалі, які расказаў, што неўстаноўлены злачынца вырваў прабой на ўваходных дзвярах дома ягонай маці-пенсіянеркі і пранік у пакой. Адтуль зніклі 2 алюмініевыя бітоны, 5 чыгунных кацялкоў, рыбалоўная вуда, электраправады, жалезны столік, электраматор і медныя трубкі ад халадзільніка. Па дадзеным факце ўзбуджана крымінальная справа па ч. 2 арт. 205 Крымінальнага Кодэкса Рэспублікі Беларусь. Максімальнае пакаранне, што пагражае ліхадзею – пазбаўленне волі да чатырох гадоў.
Сварка Жыхар райцэнтра пасварыўся са знаёмым з вёскі Прыазёрная. Першы, каб даказаць сваю правату, накінуўся на муж-чыну з Прыазёрнага з кулакамі і прычыніў яму цяжкія цялесныя пашкоджанні. Па дадзеным факце ўзбуджана крымінальная справа. Максімальнае пакаранне — пазбаўленне волі да трох гадоў са штрафам або без яго.
Аліменты Супраць жыхара райцэнтра ўзбуджана крымінальная справа за нявыплату аліментаў на непаўналетніх дзяцей. Максімальнае пакаранне — абмежаванне волі да трох гадоў або пазбаўленне волі да аднаго года.
СА ЗВОДАК ДАІ
Колы Жыхар абласнога цэнтра паведаміў у ДАІ, што на дарозе Р-20 ён наехаў на яміну і пашкодзіў колы свайго аўтамабіля «Таёта». Здарэнне адбылося на ўчастку аўтадарогі паміж г. п. Обаль і аг. Мікіціха. Падрабязнасці высвятляюцца.
Лось У дзяржаўтаінспекцыю патэлефанаваў палачанін, які паведаміў, што на аўтадарогу (ля Обалі) нечакана выбег лось, які загінуў пад коламі «Фальксвагена». Па дадзеным факце праводзіцца праверка.
Падрыхтавала Людміла ЗУЙКОВА.
