Курсанты – у дапамогу. У рэальную абстаноўку
Больш за 300 прыватных домаўладанняў і кватэр у Шумілінскім раёне абследавалі ў пятніцу 19 мая курсанты Універсітэта грамадзянскай абароны МНС, якія сталі ўдзельнікамі трохдзённага вучэбна-палявога збору на Віцебшчыне. Такім чынам яны адпрацавалі практычныя навыкі правядзення прафілактычнай работы ў жылым сектары ў рэальнай абстаноўцы.
Па словах начальніка райаддзела па надзвычайных сітуацыях Андрэя Сасновіча, у Шуміліне, Обалі, населеных пунктах Дабейскага і Светласельскага сельсаветаў наведаны 319 домаўладанняў, з іх 16 – адзінокіх, 126 – адзінока пражываючых, 29 – мнагадзетных сямей, 45 домаўладанняў грамадзян, якія злоўжываюць спіртнымі напоямі, 102 сям’і, дзе выхоўваюцца адно-два дзіцяці.
У 92 домаўладаннях выяўлены парушэнні правілаў пажарнай бяспекі, у 50 з іх – па пытаннях пячнога ацяплення.
Па выяўленых парушэннях накіраваны інфармацыі ў адпаведныя суб’екты прафілактыкі для прыняцця мер рэагавання ў межах кампетэнцыі.
Важнасць інфармавання заключаецца ў своечасовасці рэагавання па аказанні дапамогі грамадзянам, якія маюць патрэбу ў дадатковай сацыяльнай абароне.
Акрамя работы ў жылым сектары, на гандлёвых пляцоўках «Санты» і «ФіксПрайса» курсанты ўніверсітэта разам з работнікамі сектара прапаганды «заступілі на пасаду бяспекі». На пляцоўках МНС кожны пакупнік мог паўтарыць важныя правілы: як дзейнічаць пры пажары, як правільна паведаміць у службу ратавання пра здарэнне ( 101 і 112). І самае галоўнае – як не дапусціць пажару ў сваім доме.
Трэба дадаць, што да пачатку правядзення прафілактычнай работы курсанты сталі ўдзельнікамі мітынгу на брацкіх могілках, ушанавалі хвілінай маўчання памяць пра загінуўшых, усклалі кветкі.
Алена КАРПУШЭНКА.
