Усе культурныя шляхі вялі на Гарадоцкі Парнас
Такой канцэнтрацыі беларускай мовы і беларускасці Гарадок яшчэ не бачыў. У мінулыя выхадныя, 2 і 3 верасня, ён на два дні гасцінна запрасіў усіх, хто ў адказе за слова, усіх, хто любіць родную мову і культуру. Свята літаратуры і слова піша гісторыю з 1994 года. Усё пачыналася ў Полацку – калысцы беларускай дзяржаўнасці і культуры.
Сімвалічна, што і трыццаты па ліку форум прайшоў на віцебскай зямлі, якая падарыла свету Францыска Скарыну і Ефрасінню Полацкую. На галоўнай сцэне, кніжных кірмашах, за круглымі сталамі раскрывалі важную тэму года – міру і стварэння, а яшчэ адзначылі 140-годдзе з дня нараджэння беларускага пісьменніка, перакладчыка і драматурга Янкі Маўра.
Дзень беларускага пісьменства традыцыйна стаў не толькі нагодай успомніць пра наша славутае літаратурнае мінулае, але і рэдкім унікальным шанцам пазнаёміцца з пісьменнікамі-сучаснікамі. З аднымі вядомымі паэтамі, празаікамі, журналістамі і публіцыстамі можна было пагутарыць асабіста, узяць аўтограф і сфатаграфавацца. Другіх – лепшых аўтараў мінулага года, пераможцаў Нацыянальнай літаратурнай прэміі, прозвішчы і творы якіх былі агучаны на галоўнай сцэне падчас урачыстай цырымоніі адкрыцця свята – запісаць у сваю памяць, каб пасля абавязкова пачытаць. Акрамя таго, у гасцей Гарадка была выдатная магчымасць па-поўніць асабістую бібліятэку арыгіналь-нымі друкаванымі творамі,а асабісты фотаальбом – адмысловымі фотаздымкамі са шматлікіх фотазон.
Дзень беларускага пісьменства наведалі высокія госці – намеснік прэм’ер-міністра Ігар Петрышэнка, міністр інфармацыі Уладзімір Пярцоў, старшыня Віцебскага аблвыканкама Аляксандр Субоцін, старшыня Віцебскага абласнога Савета дэпутатаў Уладзімір Цярэнцьеў, Мітрапаліт Мінскі і Заслаўскі, Патрыяршы Экзарх усяе Беларусі Веніямін і многія іншыя.
Арганізатары народнага нацыянальнага свята пастараліся на славу, прапанавалі шматлікія тэматычныя выставы, прэзентацыі, фэсты, майстар-класы, конкурсы, інтэрактыўныя пляцоўкі для ўсіх узростаў. І варта прызнаць галоўнае – ва ўсім адчувалася непарушнае адзінства беларускага друкаванага слова з гісторыяй беларускага народа, яго цесная сувязь са славянскімі вытокамі. Сапраўды, беларусам ёсць чым ганарыцца – беларускае пісьменства мае шматвекавыя традыцыі. Асветнікі беларускага народа – асобы еўрапейскага маштабу.
Прыемна адзначыць, што стаць удзельнікамі свята і адчуць яго атмасферу пажадалі і многія жыхары Шуміліна.
У гэтыя дні ўсе шляхі вялі на Гарадоцкі парнас! Адны прыехалі ў Гарадок на сваім транспарце, другія скарысталі выдатную прапанову Шумілінскага ФАЦа (арганізатар Ірына Кулікава) – прыехаць арганізавана на аўтобусе. І ўсе засталіся ў захапленні ад убачанага і пачутага: адчулі на гарадоцкіх вулачках подых мінулых ста-годдзяў, наталіліся на творчых пляцоўках прыгажосцю роднага слова.
Многія таксама адзначылі, што Гарадок сустрэў абноўленымі скверамі і паркамі (цэнтральны абноўлены парк, дзе ўстаноўлены помнік галоўнаму герою паэмы палясоўшчыку Тарасу, займеў новую назву – Вераніцынскі сквер ), добраўпарадкаванымі вуліцамі і будынкамі, святочнай непаўторнай атмасферай.
Свята адзінства нацыянальнага слова атрымалася шматгранным, каларытным і хлебасольным. У беларусаў па-іншаму не бывае.
Алена КАРПУШЭНКА.
Сталіцай юбілейнага ХХХ Дня беларускага пісьменства стаў Гарадок дзякуючы таму, што аўтарам самай вядомай у ХІХ стагоддзі беларускай сатырычнай паэмы «Тарас на Парнасе» з’яўляецца ўраджэнец Гарадоцкага раёна Канстанцін Вераніцын.
Дарэчы, доўгі час літаратуразнаўцы называлі твор ананімным, толькі ў 1970-я даследчык Генадзь Кісялёў адкрыў свету імя яго аўтара і паказаў дакладную дату напісання – 1855 год. Твор называюць жамчужынай беларускай паэзіі.
На Фестывалі кнігі і прэсы была прадстаўлена і раённая газета «Герой працы», крыніца беларускага слова.
На «Гарадоцкім Парнасе» з канцэртнай праграмай выступіў народны калектыў «Гульбічы».
На ўрачыстым закрыцці фестывалю беларускага слова Гарадок перадаў эстафету наступнага Дня беларускага пісьменства гораду Івацэвічы Брэсцкай вобласці.
