Гарачая вясна. Ад 10 да 30 базавых. Ратавальнікі нагадваюць, за што можна атрымаць штрафы вясной
Ратавальнікі канстатуюць: кожную вясну набывае вострую актуальнасць праблема выпальвання сухой расліннасці. Самае сумнае ва ўсім гэтым тое,што палы часта прыводзяць да трагедый. Менавіта таму такі здавалася б на першы погляд звычайны і бяскрыўдны занятак караецца законам.
З надыходам цёплых дзён, нагадваюць у райаддзеле па надзвычайных сітуацыях, дачнікі і гаспадары прыватных дамоў бяруцца актыўна наводзіць парадак на ўчастках, прыбіраюць смецце. Але часта забываюць, што генеральная ўборка з выкарыстаннем адкрытага агню можа пагражаць як іх уласнаму здароўю і жыццю, так і будынкам, і аўтамабілям, і іншай маёмасці.
Акультурваючы свой зямельны надзел, не-каторыя грамадзяне разводзяць вогнішчы і выпальваюць сухую расліннасць, пакінуўшы полымя без нагляду. Такія паводзіны катэгарычна забаронены, падкрэсліваюць ратавальнікі. Парушальнікаў парадку могуць прыцягнуць да адміністрацыйнай адказнасці.
«За травяны пал пагражае штраф у памеры ад 10 да 30 БВ – у грашовым выражэнні гэтая сума складае ад 400 руб. да 1,2 тыс. руб., – паведаміў інспектар РАНС Вадзім Півавараў. – Пераканаўча просім распачынаць навядзенне парадку на прысядзібным участку ў зацішнае надвор’е. Леташнюю сухую траву, лісце і іншае смецце варта згрэбці ў кучу. А перш, чым браць у рукі запалкі, неабходна падрыхтаваць месца для вогнішча і акапаць яго. Толькі пасля гэтага можна паліць смецце. Але за агнём варта пастаянна сачыць і трымаць напагатове вядро з вадой або вогнетушыцель. Можна падрыхтаваць рыдлёўку і пясок. Пасля спальвання смецця месца гарэння трэба заліць вадой і пераканацца, што вогнішча больш не тлее».
Шумілінскія ратавальнікі звяртаюцца да бацькоў з просьбай растлумачыць сваім дзецям, з якой небяспекай і трагедыяй можна сутыкнуцца пры выпальванні сухой расліннасці.
Толькі асцярожнасць і здаровы сэнс дапамогуць пазбегнуць няшчасных выпадкаў і трагічных наступстваў, канстатавалі яны.
Алена КАРПУШЭНКА.
ЛІЧБЫ І ФАКТЫ
У 2023 годзе ў Беларусі было ліквідавана 610 лясных і тарфяных пажараў, загаранняў травы і кустоў. На тэрыторыі Віцебскай вобласці летась ліквідавана 58 лясных пажараў (з іх 3 – у Шумілінскім раёне), 13 загаранняў торфу, 153 загаранні травы і кустоў (2 – у Шумілінскім раёне).
