Ад скаргаў да просьбаў і слушных заўваг
5 званкоў паступіла «на прамую лінію» да старшыні райвыканкама Сяргея Галынчыка, якую ён правёў 30 сакавіка, у суботу. Жыхары раёна звярнуліся па пытаннях жыллёва‑камунальнай сферы, дарожнага будаўніцтва і добраўпарадкавання.
Першым патэлефанаваў старэйшына вёскі Прыазёрная і папрасіў у кіраўніка раёна садзейнічання ў правядзенні рамонту 150 м дарогі да шматпавярховак. Намеснік старшыні райвыканкама Руслан Насцюшкін, які прысутнічаў на «прамой лініі», паведаміў, што ў красавіку на дадзеным участку дарогі запланавана падсыпка шчэбенем. «Пытанне будзе знаходзіцца на кантролі да яго вырашэння», – адказаў заяўніку С. А. Галынчык.
Два званкі паступілі ад жыхароў г. п. Обаль. Жанчыну, якая пражывае ў доме на вуліцы Даўмана, непакояць адкрытыя калодзежы каля пажарнага вадаёма. Драўляныя люкі згнілі, і калодзежы ўяўляюць небяспеку найперш для дзяцей, якія ў цёплыя вясеннія дні высыпалі гуляць у двары і на вуліцы, заўважыла яна. Кіраўнік раёна неадкладна даў даручэнне адказным службам разабрацца, каму адносяцца калодзежы, і пры няць меры па абмежаванні доступу да іх.
Няма халоднай вады на пятым паверсе ў шматпавярхоўцы на вуліцы Першамайскай – агучыла праблему другая абальчанка. Дырэктар УП ЖКГ Аляксей Шпакаў, які таксама прысутнічаў на «прамой лініі», адразу ж звязаўся з начальнікам падраздзялення «Обальскае» і ўдакладніў сітуацыю. Прычынай часовых перабояў у падачы халоднай вады стала прамыўка цеплаабменніка.
Жыхар райцэнтра ў тэлефонным звароце выказаў слушную заўвагу: некалькі год таму ў Шуміліне быў пабудаваны тратуар ад чыгункі ў бок Сіроціна, да паварота на Шумілінскі лясгас. Толькі вось як жыхарам вуліц «залініі» пераходзіць дарогу – пешаходны пераход уладкаваны толькі ў канцы тратуара, пры павароце на той самы лясгас. Пытанне для вывучэння адрасавана намесніку старшыні райвыканкама Р. М. Насцюшкіну.
Апошні званок быў ад дачніка, які пражывае ў вёсцы Мясаедава. Мужчына пацікавіўся ў старшыні райвыканкама, хто ў нас у раёне вырабляе бетонную агароджу, папрасіў кантакты вытворцаў і арганізацый, якія займаюцца іх устаноўкай.
Па ўсіх пытаннях, якія паступілі на «прамую лінію», вызначаны адказныя службы і тэрміны для вырашэння. Пра вынікі разгляду заяўнікі будуць праінфармаваны.
Алена КАРПУШЭНКА.
