Прапанавалі работу на лета. 24 красавіка ў Шуміліне прайшоў маладзёжны кірмаш вакансій, на які былі запрошаны старшакласнікі шумілінскіх школ.
Моладзь Шуміліншчыны віталі намеснік старшыні райвыканкама Святлана Цімашэнка і першы сакратар райкама БРСМ Вікторыя Беляева.
Начальнік упраўлення па працы, занятасці і сацыяльнай абароне райвыканкама Ларыса Жукава расказала пра асаблівасці працаўладкавання непаўналетніх, рэжым іх працы, працягласць рабочага часу і іншае. Яна прадставіла арганізацыі і прадпрыемствы, якія прапануюць маладым людзям часовую работу ў летні час.
У сваіх выступленнях прадстаўнікі арганізацый і прадпрыемстваў раёна расказвалі пра асаблівасці працы на працоўных месцах, якія прапаноўваюцца моладзі. Так, сельгаспрад-прыемствы прапанавалі па 3-5 працоўных месцаў на зернетаках і складах падчас уборкі жніва, лясгас запрасіў старшакласнікаў на праполку ў гадавальнік лясных культур, ПМК-70 – рознарабочымі на будаўнічыя пляцоўкі.
Прадстаўнік студатраднага руху Кірыл Трафімаў нагадаў гісторыю студатрадаў Беларусі, расказаў пра галоўныя аб’екты, на якіх працавалі і будуць працаваць сёлета беларускія студэнты. Студэнты таксама працуюць праваднікамі на чыгунцы, выхавальнікамі ў дзіцячых аздараўленчых лагерах, рабочымі на розных будоўлях, у тым ліку і за межамі Беларусі. Кожны удзельнік кірмашу атрымаў буклеты з прапановамі і нарматыўнымі дакументамі.
Пасля завяршэння плянарнай часткі старшакласнікі мелі магчымасць падысці да прадстаўнікоў арганізацый, каб скласці канкрэтную размову пра сваю летнюю працу. Дарэчы, найбольшую цікаўнасць выклікала прапанова Шумілінскага лясгаса.
Сяргей ЕРМАЛАЕЎ.