Юныя гвардзейцы – юныя патрыёты
У Шуміліне выбралі лепшы ваенна-патрыятычны клуб
У СШ № 1 г. п. Шуміліна прайшоў першы раённы агляд-конкурс ваенна-патрыятычных клубаў, у якім прынялі ўдзел каманды «Юны гвардзеец» з СШ № 1, «Праметэй» з Мікіціхінскай СШ і «Дабраволец» з Кардонскай СШ. Гэта свята патрыятызму сабрала разам вучняў, настаўнікаў і ўсіх, хто не абыякавы да будучыні сваёй краіны.
Агляд-конкурс складаўся з трох этапаў: прэзентацыі ваенна-патрыятычнага клуба, агляду строю і інтэлектуальна-пазнавальнай гульні «Я – патрыёт!». Кожны этап быў нацэлены на тое, каб дзеці маглі праявіць не толькі свае веды, але і творчы падыход, і камандны дух.
Падчас прэзентацыі члены клубаў распавядалі пра сваю дзейнасць, мэты і дасягненні, дзяліліся праектамі і ідэямі. «Мы патрыёты, і ў адказе за будучыню краіны. Абяцаем захаваць гістарычную праўду», – гучала ў кожным выступленні.
Агляд строю прадэманстраваў высокі ўзровень падрыхтоўкі, што было адзначана начальнікам адасобленай групы Шумілінскага раёна ваеннага камісарыяту Бешанковіцкага і Шумілінскага раёнаў Андрэем Собіным.
На этапе інтэлектуальна-пазнавальнай гульні «Я – патрыёт» удзельнікі адказвалі на пытанні пра гераічныя і трагічныя старонкі Вялікай Айчыннай вайны.
Па выніках усіх этапаў першае месца прысуджана камандзе «Юны гвардзеец», другое – камандзе «Праметэй», трэцяе – «Дабраволец». Пераможца і прызёры былі ўзнагароджаны граматамі, кожны ўдзельнік атрымаў порцыю станоўчых эмоцый і новых уражанняў.
Аляксандр ШЭДЗЬКО.
