Шумілінскія сувязісты трымаюць марку
Тэхнічны прагрэс, прынцыпова новае абсталяванне, лічбавізацыя сістэм сувязі пашырылі кола паслуг электрасувязі, якія аказвае РУП “Белтэлекам”, узнялі на новы ўзровень іх якасць.
– Тэлефонная сувязь, паслугі высокахуткаснага інтэрнэту, лічбавага тэлебачання, відэакантролю – гэта найбольш запатрабаваныя насельніцтвам паслугі электрасувязі, – расказаў начальнік Шумілінскага ўчастка электрасувязі Юрый Маскалькоў. – Агульная колькасць гэтых паслуг значна шырэй. Развіваецца і набывае па пулярнасць новы напрамак – рэалізацыя спажывецкіх тавараў, якія мы таксама прапануем нашым кліентам, у тым ліку ў растэрміноўку.
Мадэрнізацыя сетак электрасувязі, пераход на оптавалаконныя сістэмы, абнаўленне абсталявання дазваляюць значна павышаць якасць паслуг, што таксама спрыяе папулярнасці нашых паслуг. Так, поўнасцю завершаы пераход на оптавалакно ў шмакватэрным жылым сектары Шуміліна і Обалі, зараз вядзецца будаўніцтва оптавалаконных ліній у прыватным сектары, у сельскай мясцовасці. Апошні буйны аб’ект – аграгарадок Башні. Развіццё сетак сувязі працягваецца.
«Напярэдадні прафесійнага свята хачу павіншаваць усіх работнікаў участка і ветэранаў працы і пажадаць моцнага здароўя і поспехаў у выкананні вытворчых задач», – сказаў Юрый Маскалькоў.
Шумілінскія сувязісты трымаюць марку і пастаянна паказваюць годныя вынікі ў рабоце, што адзначаецца на розных узроўнях. Так, у мінулым годзе Шумілінскі ўчастак электрасувязі быў занесены на Дошку гонару Шумілінскага раёна. Сёлета з нагоды прафесійнага свята работнікі ўчастка ўзнагароджаны на рэспубліканскім і абласным узроўнях:
МАСКАЛЬКОЎ Юрый Рыгоравіч, начальнік Шумілінскага ўчастка электрасувязі Віцебскага занальнага вузла электрасувязі – занесены на Дошку гонару РУП «Белтэлекам»;
ЛАЗАР Андрэй Ігаравіч, інжынер лінейных збудаванняў сувязі і абаненцкіх прылад лінейна-тэхнічнай групы Шумілінскага УЭС – на Дошку гонару Віцебскага філіяла РУП «Белтэлекам»;
СТАЛЯРОЎ Аляксей Віктаравіч, інжынер электрасувязі станцыйнай групы Шумілінскага УЭС – узнагароджаны Ганаровай граматай Віцебскага філіяла РУП «Белтэлекам»;
ІЗАЎ Аляксей Віктаравіч, інжынер лінейных збудаванняў сувязі і абаненцкіх прылад лінейна-тэхнічнай групы Шумілінскага УЭС – аб’яўлена Падзяка дырэктара Віцебскага філіяла РУП «Белтэлекам».
Сяргей ЕРМАЛАЕЎ.
