Хоць трава не расці
Расце непасеяная – гэта пра траву. Хочацца, каб яна расла марудна, але так не атрымліваецца. Спрыяльнае надвор’е (цёпла і дожджык палівае) “гоніць” траву ўверх. Добра той сям’і, дзе ёсць гаспадар, які на “ты” з трымерам. Многіх выручаюць сваякі, суседзі ці знаёмыя. А калі чалавек сталага ўзросту ці адзінокі, то за паслугамі абкосу можна звярнуцца ў ТЦСАН.
Так зрабілі гаспадары дома па вуліцы Юбілейнай. «Дачка Людміла кожны год заказвае касца ў ТЦСАН, і не адзін раз за сезон, – расказала Раіса Васільеўна Папалава. – Вельмі добра, што ёсць такая паслуга. Спецыялісты загадзя тэлефануюць, калі падышла чарга на абкос, потым разлічваемся. Сяджу вось на лавачцы і любуюся, як спрытна мужчына ўпраўляецца з трымерам. Заканчвае ўжо касіць – амаль тры соткі травы як і не было». За добрую работу жанчына хваліць сацыяльнага работніка ндрэя Тарбеева. Вось ужо на працягу пяці гадоў (столькі А. Тарбееў працуе ў цэнтры) абкос кладзецца на яго плечы. Спраўляецца за дзень прыкладна з 15 соткамі.
«Мы аказваем паслугі пенсіянерам і інвалідам першай і другой груп, – расказала спецыяліст па сацыяльнай рабоце аддзялення комплекснай падтрымкі ў крызіснай сітуацыі ТЦСАН Аксана Аўчыннікава. – Адна сотка абкосу каштуе 7 рублёў 55 капеек. Выезд па райцэнтры бясплатны. А калі заказчыкі жывуць у іншых населеных пунктах, бяруцца аўтапаслугі – 46 капеек за адзін кіламетр». Андрэй Тарбееў абкошвае падворкі не толькі ў райцэнтры,
ёсць заказы з Сіроціна, Грабніцы, Беразніцы, Баёўкі і іншых вёсак. Сваёй чаргі чакаюць больш як трыццаць чалавек. Але на працягу двух тыдняў пасля падачы заяўкі касец абавязкова прыедзе на кожны падворак. Андрэй Тарбееў
Ларыса ЗАЙЦАВА.
