З кастрычніка на базе СШ № 1 імя Героя Савецкага Саюза П. А. Акуцыёнка традыцыйна стартуе работа «Школы будучых першакласнікаў» – падрыхтоўчай праграмы, якая ўжо некалькі гадоў дапамагае дзецям упэўнена і з цікавасцю рабіць першыя крокі да школьнага жыцця. Гэтая добрая традыцыя ўстановы адукацыі стала важнай часткай выхаваўчай і педагагічнай работы школы.
Ва ўтульнай, добразычлівай атмасферы дзеці пазнаёмяцца са школьнымі традыцыямі, разаўюць увагу, мову, мысленне, навучацца працаваць у групе і выказваць свае думкі. Усё гэта – без стрэсу і перагрузак, з клопатам пра псіхалагічны камфорт кожнага дзіцяці. Асаблівую каштоўнасць праграме надае ўдзел вопытных і захопленых педагогаў пачатковых класаў. Гэта не проста спецыялісты – гэта людзі, якія шчыра любяць дзяцей, умеюць бачыць у кожным дзіцяці асобу і ствараць атмасферу даверу і натхнення.
«Для мяне важна, каб дзіця адчула, што школа – гэта месца, дзе яго чакаюць, дзе цікава і бяспечна. Мы вучым не толькі чытаць і лічыць, але і сябраваць, слухаць, здзіўляцца», – дзеліцца Наталля Ніканава. «Кожны занятак – гэта маленькае адкрыццё. Мы гуляем, малюем, але галоўнае – вучым быць разам. Бацькі часта дзівяцца, як хутка дзеці пачынаюць адчуваць сябе вучнямі», – адзначае Кацярына Сідарава. «Я заўсёды кажу: будучы першакласнік – гэта не проста вучань, гэта даследчык. Мы ствараем асяроддзе, дзе дзіця можа спрабаваць, памыляцца, радавацца поспеху. І гэта дае ўпэўненасць», – дадае Наталля Шарэнка.
Заняткі будуць праходзіць па суботах і ўключаць гульнявыя практыкаванні па развіцці мовы, элементарнай матэматыкі і навакольнага свету; творчыя майстэрні; заданні на развіццё памяці, увагі і дробнай маторыкі; знаёмства з правіламі паводзін у школе і асновамі вучэбнай дзейнасці.
Для бацькоў прадугледжаны кансультацыі, адкрытыя сустрэчы, дзе можна будзе абмеркаваць поспехі дзяцей і задаць пытанні спецыялістам.
Запіс на заняткі ўжо адкрыты. Падрабязную інфармацыю можна атрымаць па тэлефоне 5-41-84.
Людміла СІМАНОВІЧ, намеснік дырэктара па вучэбнай рабоце СШ № 1 імя Героя Савецкага Саюза П. А. Акуцыёнка.
