Грэка-рымская барацьба
Шумілінскі барэц Ягор Заўялаў выйграў абласныя спаборніцтвы «Алімпійскія дні моладзі па грэка-рымскай барацьбе». Выхаванец Шумілінскай СДЮШАР Вадзім Несцярэнка заваяваў на спаборніцтвах трэцяе месца. Трэніруе барцоў Юрый Сцяпанаў.
Валейбол
10-11 кастрычніка ў Шумілінскай СДЮШАР прайшлі гульні першага тура абласнога першынства дзіцяча-юнацкай валейбольнай лігі «Мяч над сеткай» сярод дзяўчат 2013-2014 гадоў нараджэння і маладзей. На валейбольную пляцоўку выходзілі каманды з Шуміліна, Віцебска (дзве каманды) і Бешанковіч. На рахунку шумілінскіх валейбалістак адна перамога і два паражэнні.
Настольны тэніс
40 юных аматараў малой ракеткі з устаноў адукацыі раёна змагаліся за перамогу ў першынстве Шуміліншчыны па настольным тэнісе, якое прайшло ў рамках раённай спартакіяды школьнікаў. Першае месца сярод гарадскіх школ «узялі» обальскія спартсмены (настаўнік фізкультуры Віктар Гусакоў), сярод сельскіх школ перамогу святкавала каманда Амбросавіцкай школы (Юрый Лапацін). У суперфінале, дзе сустрэліся обальскія і амбросавіцкія тэнісісты, ва ўпартай барацьбе выйграла каманда Обальскай СШ, якая і будзе абараняць гонар раёна на абласной спартакіядзе школьнікаў.
Вавінам в’ет во дао
Добра выступілі спартсмены з аб’яднання па інтарэсах «Асновы ўсходніх адзінаборстваў: вавінам в’ет во дао» раённага цэнтра дзяцей і моладзі (трэнер Святлана Бараноўская) ў Маладзечне на розыгрышы адкрытага Кубка Мінскай вобласці па вавінам в’ет во дао. У камандным заліку ў тэхнічнай праграме спаборніцтваў шумілінцы сталі трэцімі. У паядынках першымі сталі Кірыл Смірноў і Аляксандр Канагатаў, у тэхніцы – Марыя Яскевіч, Глеб Лашкоў заваяваў для каманды два прызавыя месцы ў тэхніцы (другое і трэцяе).
Аляксандр ШЭДЗЬКО.
