Зіма стартуе фінансавымі пераменамі і штрафамі за ўсесезонныя шыны. Чаго яшчэ чакаць у снежні?
- Банкаўскія змены
З 1 снежня «Беларусбанк» уносіць змяненні ў Правілы карыстання карткамі і ўмовы прадастаўлення, абслугоўвання і выкарыстання асабістай банкаўскай плацежнай карткі. Гэта паўплывае на якасць кліенцкага сэрвісу. Кліентам далі права аператыўна заблакіраваць карту праз званок у кантакт-цэнтр па кароткім нумары 147. Але ёсць нюанс. Тэлефанаваць неабходна з тэлефона, які прывязаны да ўліковага запісу грамадзяніна ў банку. Ёсць і яшчэ адна прыемная навіна для трымальнікаў карт «Беларусбанка». З мэтай бяспекі перавыпускаць «пластык» будуць з унікальным нумарам.
- Вырасце дапамога на пахаванне
Сям’я памерлага мае права атрымаць дапамогу на пахаванне на працягу 6 месяцаў з дня смерці чалавека, а ў выпадку працяглага вышуку нябожчыка – не пазней за 6 месяцаў з дня пахавання. Памер выплаты фіксаваны. Дапамога на пахаванне залежыць ад сярэдняга заробку па краіне. У снежні выплата будзе больш, чым у лістападзе на 11 руб.60 кап. А ўсё таму, што сярэдняя зарплата за кастрычнік вырасла ў параўнанні з даходамі ў верасні і склала ў сярэдзіне восені 2758 руб. 60 кап. Такім будзе і памер дапамогі на пахаванне ў снежні.
- Штраф за ўсесезонныя шыны
У пачатку восені ў Беларусі ўступілі ў сілу новыя правілы дарожнага руху. У іх ёсць пункт, які тычыцца выкарыстання зімовых шын. Патрабаванні засталіся тыя ж — з 1 снежня да 1 сакавіка аўтамабілісты абавязаны «пераабуць» свае транспартныя сродкі ў зімовую гуму. Калі раней зімой можна было перасоўвацца і на ўсесезонных шынах, то зараз да зімовай гумы змянілі патрабаванні. У гэты перыяд года дазволена ездзіць толькі на шынах з маркіроўкай лацінскімі літарамі M і S і значком у выглядзе горнай вяршыні з трыма пікамі і сняжынкай.
Парушальнікаў новых правілаў чакае пакаранне. У першы раз вадзіцеляў могуць папярэдзіць або аштрафаваць на суму да 1 БВ. Пры паўторным парушэнні сума спагнання складзе ад 2 да 5 БВ.
- Зімовыя канікулы для школьнікаў
Традыцыйна ў канцы года вучняў школ і гімназій чакаюць зімовыя канікулы. У 2025/2026 навучальным годзе школьнікі будуць адпачываць зімой два тыдні. Дзеці пойдуць на адпачынак 25 снежня, а вернуцца да навучальнага працэсу ўжо ў новым годзе – 8 студзеня 2026 года.
- … і міні-адпачынак для дарослых
Дарослае насельніцтва ў першы месяц зімы таксама чакаюць сапраўдныя «канікулы». У канцы снежня працоўныя будуць адпачываць 4 дні запар — з 25 па 28 снежня. Нагадаем, што 25 снежня ў Беларусі афіцыйны непрацоўны дзень – каталікі святкуюць Каляды. Урачыстасць у 2025 годзе выпадае на чацвер. Для зручнасці работнікаў працоўны дзень з пятніцы, 26 снежня, урад перанёс на суботу, 20 снежня. Дзякуючы такой ракіроўцы беларусы атрымалі ў канцы года міні-канікулы.
