У Шуміліне запаліліся новыя зоркі
Упершыню на шумілінскай сцэне прайшоў конкурс вакальнага майстэрства «Адкрый свой голас». Новае творчае спаборніцтва аб’яднала захопленых выканаўцаў раёна, якія выказалі жаданне прадэманстраваць свой артыстызм, талент і вакальныя дадзеныя перад шырокай публікай і кампетэнтным журы. За званне пераможцы ў музычным батле змагаліся шэсць канкурсантак, прадстаўніцы абсалютна розных прафесій і інтарэсаў: Анастасія Лялюга (Шумілінскі раённы цэнтр дзяцей і моладзі), Алена Жыгалка (Обальскі ГДК), Паліна Лазар (ТАА «ВЕЖА»), Сабіна Салахава (Мікіціхінскі дзіцячы сад), Вікторыя Кузняцова (Шумілінскі раённы Савет дэпутатаў) і Анастасія Волкава (участак паштовай сувязі Шуміліна).
Конкурсная праграма праходзіла ў два этапы: першы тур патрабаваў ад удзельніц лірычнага і глыбокага выканання, у той час як другі быў напоўнены запальнымі, драйвовымі рытмамі. Такі кантрасны фармат дазволіў удзельніцам у поўнай меры раскрыць свой вакальны патэнцыял і артыстызм, прымерыўшы на сабе розныя музычныя вобразы і стылі. Дзяўчаты прадставілі на суд журы і гледачоў паўнавартасныя міні-спектаклі з прадуманай тэатралізацыяй і арыгінальным выкарыстаннем сцэнічных атрыбутаў. Удала падабраныя відэасуправаджэнне, светлавое рашэнне і харэаграфія – усё працавала на агульную канцэпцыю кожнага нумара. За бездакорнай сцэнічнай эстэтыкай і відовішчнасцю шоу выразна адчувалася прафесійная рука спецыялістаў РЦК, якія правялі каласальную падрыхтоўчую работу з удзельніцамі. Асаблівую дынаміку і маштабнасць выступленням надалі харэаграфічныя пастаноўкі, аўтарамі якіх сталі Дар’я Сцяпанава і Ілона Карнілава. Яркай часткай канцэртных нумароў сталі танцоры калектываў «Шарм» і «Рытміксікі», якія здолелі падкрэсліць індывідуальнасць кожнай вакалісткі.
Пасля доўгай нарады судзейскай калегіі для абвяшчэння вынікаў на сцэну выйшлі члены журы. Усе ўдзельніцы заслужана заваявалі перамогу ў сваёй персанальнай намінацыі. Паліна Лазар стала пераможцай у намінацыі «Музычны прарыў», Алена Жыгалка – у намінацыі «Артыстызм і харызма», Сабіна Салахава – у намінацыі «Вакальная грацыя», Анастасія Лялюга – у намінацыі «Яркі дэбют». Вікторыя Кузняцова забрала намінацыю «Голас без межаў» і прыз сімпатый гледачоў. Але галоўная інтрыга вечара вырашылася аб’яўленнем уладальніцы галоўнай узнагароды. Пераможцай у намінацыі «Голас майго горада» стала, заслужана атрымаўшы галоўны прыз, Анастасія Волкава, – выканаўца, якая скарыла суддзяў і залу сваім моцным і глыбокім вакалам.
Правядзенне такога яркага конкурсу стала магчымым дзякуючы вялікай падтрымцы аднадумцаў. Узнагародны фонд, памятныя падарункі і спецыяльныя прызы былі прадастаўлены спонсарамі, у ліку якіх былі раённая арганізацыя РГА «Белая Русь», раённая арганізацыя ГА «Беларускі фонд міру», раённая арганізацыя ГА «Беларускі рэспубліканскі саюз моладзі», магазін «Эдэльвейс», участак паштовай сувязі г. п. Шуміліна, ТАА «ВЕЖА», раённы цэнтр культуры, фізкультурна-аздараўленчы цэнтр.
Яркія ўсмешкі ўдзельніц, шчырыя апладысменты гледачоў і цёплая дружалюбная атмасфера зрабілі свята музыкі незабыўным. Прыгожым фіналам стала заключная песня, якую сумесна выканалі артысты РЦК і новыя зоркі нашага горада.
Дар’я ЧАПУРНОВА.
