Па 400 тон за дзень
Сельгасарганізацыі раёна вывозяць на палеткі арганіку.
На мінулым тыдні работа вялася каля фермы Мазекі ААТ «АграБаравінка». Тут засталі маладога агранома Паўла Голубева разам з механізатарамі.
«Вывозячы гной на поле, адразу робім дзве работы: і глебу ўгнойваем, і парадак наводзім на тэрыторыі, – расказаў Павел. – Усяго плануем вывезці каля 18 тысяч тон арганікі пад веснавую сяўбу. У першую чаргу ўгнойваем палеткі, дзе будзе расці кукуруза – яе плануем засеяць 535 гектараў».
Да бліжэйшых палеткаў ад фермы Мазекі – рукой падаць, таму механізатар Ігар Пятроў паспявае зрабіць на МТЗ з гноераскідвальнікам па 50-60 рэйсаў.
Пагрузчыкам на «Амкадоры» працуе Міхаіл Канстанцінаў. «На днях на падмогу прыедзе яшчэ адзін механізатар, так што работы ў мяне прыбавіцца, – кажа Міхаіл. – Арганікі каля фермаў за зіму назапасілі нямала, так што палеткі будуць угноенымі».
Ларыса КІСЯЛЁВА.
