Не дайце печцы ўчыніць пажар
У вёсках большасць зімовых пажараў звязана з няспраўнымі печкамі і комінамі. У халодны сезон такія ўзгаранні складаюць да 80% усіх пажараў. «Прычыны тыповыя: расколіны ў муры, перагрэтыя паверхні, судакрананне печкі з мэбляй або дровамі, адкрытыя дзверцы, выпадзенне вуглёў, – адзначае інспектар РАНС Вадзім Півавараў. – Каб дом быў у бяспецы, гаспадару трэба надаць печы максімум увагі». Перад пачаткам сезона печ абавязкова правяраюць і рамантуюць – выдаткі на рамонт непараўнальныя з наступствамі пажару.
Навошта чысціць комін?
Чыстка коміна – не капрыз, а неабходнасць. Сажа зніжае цягу, печ пачынае дыміць, дровы дрэнна гараць, а забіты канал заўсёды нясе рызыку ўзгарання. Чысты комін – добрая цяга, роўнае гарэнне і бяспечная тэмпература.
Маленькі прыбор, які ратуе жыццё
Асобна варта сказаць пра аўтаномныя пажарныя апавяшчальнікі. Гэта самы просты і даступны спосаб абараніць сям’ю ад бяды. Апавяшчальнік рэагуе на дым за секунды і падае гучны сігнал, нават калі людзі спяць. У прыватных дамах, асабліва з пячным ацяпленнем, такія прыборы павінны быць у кожным жылым пакоі. Гэта не фармальнасць, а рэальная страхоўка: большасць трагедый адбываецца ўначы, калі чалавек не можа своечасова адчуць пах дыму. Адзін невялікі датчык здольны даць каштоўныя хвіліны, каб выратавацца.
Што трэба зрабіць перад зімой?
Замяніць цэглу, якая трэснула, і прамазаць мур.
Аднавіць пашкоджаны комін.
Памяняць няспраўныя дзверцы, засаўкі, рашоткі.
Умацаваць расхістаныя элементы, перакласці праблемныя ўчасткі.
На гарышчы дымавыя каналы павінны быць абтынкаваны і пабелены.
Падлогу перад печчу абараніць негаручым лістом 0,7х0,5 м.
Устанавіць аўтаномныя пажарныя апавяшчальнікі ў кожным жылым пакоі.
Што катэгарычна забаронена?
Паліць няспраўную печ.
Выкарыстоўваць для распальвання бензін і іншыя лёгказагаральныя вадкасці.
Закладваць дровы даўжэй топкі.
Паліць з адкрытымі дзверцамі.
Перапальваць печку.
Пакідаць печку, якая паліцца, без нагляду або даручаць кантроль дзецям.
Паліць вугалем, коксам або газам печы, не прызначаныя для гэтага.
Алена КАРПУШЭНКА.
