Ад шасці кілаграмаў да цэнтнера
На вытворчым участку Дабея ЗАТ «Віцебскаграпрадукт» парасяты праходзяць шлях ад першых дзён да здачы. За гэтым працэсам стаяць аўтаматызаванае кармленне, ветэрынарны нагляд і праца аператараў.
Першыя парасяты (каля дзесяці тысяч галоў) паступілі на вытворчы ўчастак Дабея ў верасні мінулага года, расказаў начальнік участка Віктар Гужвін. Прывозяць іх з матачнікаў з Дражна Лепельскага раёна і Нарцызава Талачынскага раёна. Вага кожнага на старце – шэсць-восем кілаграмаў. За паўгода жывёла дарастае да 120-125 кілаграмаў.
На ўчастку знаходзяцца два хлявы для дарошчвання, дзе парасяты знаходзяцца 80 дзён, і чатыры – для адкорму. Сартуецца жывёла не па пародах (тут гадуюцца свінні дацкай селекцыі «дзюрок», «ландрас», «йоркшыр»), а па ўкормленасці – каб мацнейшыя не адганялі слабых і ўсе маглі пад’есці ўволю і набраць вагу. Ручная праца мінімізавана – корм на ўчастку падаецца аўтаматычна і бесперабойна. Не заязджаючы на тэрыторыю, аўтамабілі выгружаюць корм у бункер для пэўнага хлява. Жывёлу кормяць чатырма відамі камбікорму ў залежнасці ад узросту, чыстая вада даступная пастаянна.
Аднак аўтаматыка не замяняе чалавека. На вытворчасці занятыя 15 аператараў. Іх работа патрабуе ўважлівасці: у вялікай групе важна своечасова заўважыць, калі нейкая жывёла адстае ў росце або ёй патрэбна дадатковая ўвага. Не менш важная і штодзённая гігіена – клеткі неабходна падтрымліваць у належным стане, каб у хлявах было чыста і бяспечна. «Асаблівыя патрабаванні прад’яўляюцца да саміх работнікаў, санітарна-эпідэмічныя ўмовы ў нас на вышыні. Каб трапіць на вытворчасць, аператары праходзяць праз душ, – каменціруе Віктар Гужвін. – Гэта частка сістэмы біялагічнай бяспекі, якая дапамагае абараніць жывёлу ад заносу інфекцый. Адзенне мыецца і праходзіць дэзынфекцыю кожны дзень – на прадпрыемстве ёсць тры пральныя машыны і столькі ж сушылак. Работнікам таксама забаронена трымаць свіней дома і хадзіць у лес. Выкананне гэтых патрабаванняў правярае ветэрынарная станцыя».
Значную ўвагу тут надаюць і ўтылізацыі адходаў. Гной адводзіцца ў каналізацыю, а затым паступае ў сховішча для арганікі.
Калі парасяты дасягаюць патрэбнай вагі, іх рыхтуюць да здачы. Апошнюю партыю свіней з участка адправілі на ТАА «Мясакамбінат Славянскі» ў канцы чэрвеня – пачатку ліпеня. Наступную плануецца здаць у канцы снежня. Паміж гэтымі этапамі праходзіць новы цыкл: жывёла расце, а аператары сочаць за яе развіццём і ўмовамі ўтрымання, падтрымліваюць парадак і кантралююць ход вырошчвання, каб праз шэсць месяцаў жывёла набрала вагу больш за цэнтнер.
Ларыса ЗАЙЦАВА.
