У Шумілінскім раённым аддзеле па надзвычайных сітуацыях сёння працуюць 53 чалавекі. Сярод іх каля паловы – моладзь. Толькі за апошнія тры гады ў райаддзел прыйшлі 17 маладых работнікаў. “ Мы робім стаўку на маладых,” – кажа начальнік райаддзела па надзвычайных сітуацыях І. А. Крукаў.
Камандзір аддзялення і альпініст
Самае галоўнае ў прафесіі выратавальніка – гатоўнасць дапамагчы людзям, лічыць Віктар Пальвінскі, камандзір аддзялення пажарнай аварыйна-выратавальнай часці № 12 а.-г. Слабада РАНС. Незалежна ад часу, надвор’я і асабістага настрою, выратавальнік павінен быць гатовы да любых надзвычайных сітуацый.
Віктар Пальвінскі працуе ў райаддзеле трэці год. Прывык да напружанага баявога рэжыму. Заслужыў павагу старэйшых калег за кампетэнтнасць ў рабоце, сур’ёзнае стаўленне да справы.
Баявое хрышчэнне Віктар атрымаў на сваім другім дзяжурстве, калі выязджалі тушыць пажар у Обаль. Хлопец прызнаецца, што з непрывычкі было не па сабе, калі барвовыя языкі полымя ўжо “злізалі паўдома” і выратаваць яго было проста нерэальна. Калі тушылі пажар, уважліва сачылі за тым, каб агонь не перакінуўся на суседнія дамы. У той дзень выратавалі не адзін мільён рублёў.
24-гадовы камандзір аддзялення вялікую ўвагу ўдзяляе фізічнай падрыхтоўцы. Ён патрабавальны да сябе і сваіх калег. Павышае і свой прафесійны ўзровень. Напрыклад, нядаўна на курсах у інстытуце перападрыхтоўкі і павышэння кваліфікацыі МНС Рэспублікі Беларусь, якія праходзілі ў Барысаўскім раёне, вывучыўся на прамысловага альпініста. Гэта спецыяльнасць патрэбна і выратавальнікам, бо надзвычайныя сітуацыі здараюцца і ў шматпавярховых дамах. Пакуль што не было нагоды праявіць свае альпінісцкія здольнасці. Але ж усякае можа здарыцца…
Кожны выезд – “з серыі вострасюжэтных”
На пытанне, як працуецца ў райаддзеле па надзвычайных сітуацыях, старшы вадзіцель Сяргей Шафераў адказвае коратка: “Выдатна!” Хлопец з дзяцінства любіў спецыяльнасці тэхнічнага накірунку, а старшы вадзіцель – гэта не толькі вадзіцель, але і механік, і слесар. Таму Сяргей Шафераў адчувае сябе на гэтай рабоце, як кажуць, у сваёй талерцы.
За год сваёй работы ў райаддзеле Сяргей дасканала вывучыў пажарную тэхніку і правілы бяспекі пры рабоце на ёй. Як старшы вадзіцель, Сяргей Шафераў у адказе за запраўку і спраўнасць усёй тэхнікі аддзела.
За час работы ў райаддзеле Сяргею прыходзілася ўжо многа разоў выязджаць на надзвычайныя сітуацыі. І кожная з іх, на думку маладога вадзіцеля, “з серыі вострасюжэтных выпадкаў”. “Работа выратавальнікаў – гэта не толькі тушэнне пажараў, – кажа Сяргей Шафераў. – Працуем на парывах цеплатрас, водаправодаў, выязджаем на дарожна-транспартныя здарэнні, вясной тушым запаленую траву, летам – тарфянікі. Таму выратавальнік павінен быць вельмі важна быць загартаваным, вынослівым і мужным, а тэхніка – надзейнай”.
У Мішневічах будзе пажарны пост
Усім нам хочацца, ды так і павінна быць, каб у выпадку надзвычайных сітуацый выратавальнікі прымчаліся на дапамогу імгненна. І гэта рэальна, упэўнены супрацоўнікі райаддзела па надзвычайных сітуацыях. “Па правілах пажарнай бяспекі ў радыусе 10 кіламетраў адлегласць ад кожнай вёскі павінен быць пажарны пост, – кажа першы намеснік начальніка Віцебскага абласнога ўпраўлення МНС Сяргей Шавяка. – Але рэаліі далёка ад нарматываў. У Шумілінскім раёне, напрыклад, адлегласць ад бліжэйшай пажарнай часці да Крывога Сяла 30 кіламетраў, а да Каз’яншчыны – і таго больш. Таму згодна з рашэннем Віцебскага аблвыканкама №321 ад 29 мая 2012 года “Аб мерапрыемствах на 2013 год па забеспячэнні бяспекі жыццядзейнасці сельскага насельніцтва Віцебскай вобласці ад надзвычайных сітуацый прыроднага і тэхнагеннага характару”.
Тэндар па будаўніцтву пажарнага паста “ Кошт гэтага будаўнічага аб’екта –2,9 мільярда рублёў, – кажа галоўны архітэктар раёна З. А. Мясаедава. – Нядаўна з мясцовага бюджэту выдзелена 2,6 мільярда рублёў”.
“На пажарным пасту будуць працаваць тры змены, падменны вадзіцель і начальнік паста, – кажа намеснік начальніка райаддзела па надзвычайных сітуацыях Валерый Шархун. – Сёння яшчэ нельга сказаць дакладна, але некаторых нашых работнікаў з паста а.-г. Слабада перавядзём працаваць у Мішневічы. З’явяцца і некалькі новых рабочых месцаў”.
На днях будаўнікі ААТ “Полацкая будаўнічая кампанія” прыступяць да будаўніцтва пажарнага паста, аб’ект павінен быць поўнасцю гатовы да канца года.
Надрукавана ў №57 ад 23.07.2013 г.