Падзяка ад начальніка міліцыі
Добраахвотная дружына працуе на Обальскім керамічным заводзе ўжо многа гадоў. Яе актывісты з’яўляюцца добрымі памочнікамі міліцыянераў. Яны дзяжураць на вуліцах, ахоўваюць грамадскі парадак у пасёлку падчас розных мерапрыемстваў. Неаднойчы знаходзілі злодзеяў, спынялі хуліганаў і тых, хто парушае Правілы дарожнага руху.
А нядаўна камандзір добраахвотнай дружыны Аляксандр Віктаравіч Курачоў затрымаў ля завода нецвярозага вадзіцеля матацыкла, паведаміў пра гэта ў РАУС. У райаддзеле вырашылі заахвоціць дружынніка за такі мужны ўчынак. Выказаць падзяку за актыўны ўдзел ў ахове грамадскага парадку і дапамогу міліцыянерам у прафілактыцы правапарушэнняў на Обальскі керамічны завод завіталі начальнік РАУС В. В. Мядзвецкі і начальнік ДАІ М. У. Гаралевіч.
Перад работнікамі керамічнага завода, якія сабраліся ў актавай зале, выступіў В. В. Мядзвецкі. “Мы ўдзячныя хлопцам з добраахвотнай дружыны вашага завода, якія сумленна выконваюць свой грамадзянскі доўг. Асабісты дзякуй за супрацоўніцтва камандзіру Курачову. Спадзяемся на далейшае плённае супрацоўніцтва з дружынай вашага завода”, – адзначыў Вадзім Вадзімавіч.
Ларыса ЗАЙЦАВА.
Надрукавана ў №36 ад 13.05.2014 г.