ВДС вызначыў прыярытэты развіцця Саюзнай дзяржавы на сярэднетэрміновую перспектыву да 2017 года ўключна
«Сур’ёзную практычную аддачу чакаем ад рашэнняў, прынятых на сённяшнім пасяджэнні ВДС, — сказаў Уладзімір Пуцін. — У першую чаргу маю на ўвазе прыярытэтныя напрамкі і першачарговыя задачы далейшага развіцця Саюзнай дзяржавы на сярэднетэрміновую перспектыву. Разлічваем, што іх паэтапная рэалізацыя дасць магчымасць стварыць новыя сумесныя вытворчасці і рабочыя месцы, умацаваць транспартную інфраструктуру нашых краін».
Прэзідэнт Расіі паведаміў, што ўдзельнікі пасяджэння ВДС дамовіліся напоўніць двухбаковае ўзаемадзеянне новымі праектамі ў энергетыцы, аўтамабілебудаванні, электроннай прамысловасці.
«Прадоўжым аказваць падтрымку на дзяржаўным узроўні праграмам у высокатэхналагічных сферах, — падкрэсліў Уладзімір Пуцін. — У зацверджаным сёння бюджэце Саюзнай дзяржавы на 2015 год амаль палавіна сродкаў накіравана менавіта на гэтыя мэты».
Кабякоў і Мядзведзеў падпісалі сумесны антыкрызісны план
План мерапрыемстваў урадаў Беларусі і Расіі па стварэнні дадатковых умоў для развіцця гандлёва-эканамічнага супрацоўніцтва быў падпісаны па выніках перагавораў прэм’ер-міністраў дзвюх краін.
Раней Андрэй Кабякоў заявіў, што гэты план мае пэўныя пункты, выкананне якіх павінна быць завершана на працягу гэтага паўгоддзя.
Уладзімір Пуцін адзначыў, што падпісаны сёння прэм’ер-міністрамі Беларусі і Расіі план мерапрыемстваў урадаў дзвюх краін па стварэнні дадатковых умоў для развіцця гандлёва-эканамічнага супрацоўніцтва па сутнасці з’яўляецца сумесным антыкрызісным планам, накіраваным на далейшае ўмацаванне беларуска-расійскай эканамічнай інтэграцыі.
Беларусь і Расія падпісалі пагадненні ў сацыяльнай сферы і міграцыйнай палітыцы
Акрамя рашэнняў ВДС па пытаннях парадку дня падпісаны чатыры двухбаковыя дакументы. У іх ліку пагадненне аб парадку ўзаемнага выканання судовых пастаноў па справах аб спагнанні аліментаў; пагадненне аб узаемным прызнанні і парадку выканання рашэнняў аб адмове ва ўездзе на тэрыторыю дзяржаў — удзельніц Саюзнай дзяржавы; пагадненне аб парадку абмену звесткамі аб грамадзянах Беларусі і Расіі, у адносінах да якіх дзейнічаюць абмежаванні на выезд; пратакол аб унясенні змяненняў у пагадненне аб забеспячэнні роўных правоў грамадзян Беларусі і Расіі на свабоду перамяшчэння, выбар месца знаходжання і жыхарства на тэрыторыях дзяржаў — удзельніц Саюзнай дзяржавы ад 24 студзеня 2006 года.
Беларусь і Расія маюць намер стварыць адзіную візавую прастору.
«Мы ўмовіліся прадоўжыць работу па стварэнні адзінай візавай прасторы, — сказаў Уладзімір Пуцін. — У гэтых мэтах плануецца падрыхтаваць пагадненне аб узаемным прызнанні віз, выдадзеных грамадзянам замежных дзяржаў».
Пуцін адзначыў вялікі ўклад Лукашэнкі ва ўрэгуляванне ўкраінскага крызісу
«Сёння мы гаварылі і аб міжнародных праблемах, у тым ліку і аб сітуацыі ва Украіне, — сказаў Уладзімір Пуцін. — Адзначу актыўныя намаганні Аляксандра Рыгоравіча Лукашэнкі па садзейнічанні ва ўрэгуляванні гэтай праблемы. Удзячны за арганізацыю вельмі няпростых, але абсалютна неабходных перагавораў у «нармандскім фармаце» ў Мінску».
Прэзідэнт Расіі Уладзімір Пуцін узнагародзіў Прэзідэнта Беларусі Аляксандра Лукашэнку ордэнам Аляксандра Неўскага.
Гэтым ордэнам узнагароджваюцца вядомыя расійскія і замежныя палітычныя і грамадскія дзеячы, прадстаўнікі дзелавой супольнасці замежных дзяржаў за заслугі ў супрацоўніцтве з Расійскай Федэрацыяй і аказанні садзейнічання ў яе сацыяльна-эканамічным развіцці.
Беларусь і Расія правядуць серыю сумесных мерапрыемстваў да 70-годдзя Перамогі
Паводле слоў Уладзіміра Пуціна, у святочным парадзе ў Мінску з нагоды юбілею Перамогі прымуць удзел і расійскія падраздзяленні. Акрамя таго, адбудзецца шэраг канферэнцый, форумаў, алімпіяд і іншых мерапрыемстваў.
«Для нашых народаў юбілей Перамогі — свяшчэннае свята», — падкрэсліў прэзідэнт Расіі.
Прэзідэнт Беларусі Аляксандр Лукашэнка падкрэслівае важнасць недапушчэння фальсіфікацый і перагляду вынікаў Другой сусветнай вайны.
«Мы вельмі актыўна працуем, асабліва нашы вучоныя, па процідзеянні спробам фальсіфікацыі гісторыі і скажэння гістарычнай праўды аб Другой сусветнай вайне. Што называецца, на злобу дня, асабліва апошнім часам. Хто б мог падумаць, што на прасторах былога СССР, народы якога поплеч ваявалі супраць агульнага ворага, праз 70 гадоў з’явяцца людзі, якія, мякка кажучы, не разумеюць і не ведаюць гісторыі Вялікай Айчыннай вайны. Таму нам ужо ў агульным доме даводзіцца абараняць вынікі Вялікай Айчыннай вайны і не дапусціць фальсіфікацый», — падкрэсліў Прэзідэнт.
Аляксандр Лукашэнка падзякаваў Прэзідэнту Расіі Уладзіміру Пуціну за паважлівае стаўленне і выразную пазіцыю адносна агульнай Перамогі, 70-годдзе якой святкуецца ў гэтым годзе.
