За газ – расійскімі рублямі
У разліках за газ з 1 красавіка Беларусь пераходзіць на расійскія рублі. Урад краіны адзначыў, што насельніцтва не адчуе розніцы ад новаўвядзення, а вось для прадпрыемстваў змяненні будуць істотнымі. Обальскі керамічны завод – адно з прадпрыемстваў нашага раёна, якому для вытворчасці прадукцыі неабходна вялікая колькасць «блакітнага паліва». – З расійскімі пакупнікамі ў нас надзейныя і трывалыя шматгадовыя сувязі, – расказвае дырэктар Обальскага керамічнага завода Павел Манак. – За прадукцыю з намі яны разлічваюцца толькі ў расійскіх рублях, такая сістэма аплаты была заўсёды.
Прадукцыя завода запатрабавана на будаўнічым рынку Ра-сійскай Федэрацыі, мы адпраўляем на экспарт у Расію каля 60% выпускаемай цэглы.
Павел Манак поўнасцю падтрымлівае рашэнне аб пераходзе на аплату за газ расійскімі рублямі. Да гэтага за энерганосьбіты завод разлічваўся беларускімі рублямі па курсе долара. «Вытворчасць цэглы энергаёмістая, – адзначае дырэктар ОКЗ. – Менавіта плацяжы за газ і электраэнергію складаюць большую частку затрат. Пры стабільных курсах валют можна прагназаваць сваю работу, а вось пры рэзкіх скачках гэта праблематычна. Так, напрыклад, мы планавалі, што за энерганосьбіты будзем штомесячна плаціць каля 350 тысяч беларускіх рублёў, але ў сакавіку долар скокнуў – у выніку рахунак за спажытыя газ і электраэнергію склаў 500 тысяч рублёў. Вось і атрымліваецца, што кожны скачок валют – праблемы для прадпрыемства. На мой погляд, нам даўно ўжо трэба было “прывязацца” ў разліках да ра-сійскага рубля».
Пераход на расійскую валюту азначае, што з грашовага ланцуга знікае трэцяя валюта – долар ЗША, і для Обальскага керамічнага завода гэта вялікі плюс.
«Зразумела, што калі дзяржава набывала газ за долары, то і мы вымушаны былі разлічвацца за энерганосьбіты той жа валютай, – канстатуе Павел Іванавіч. – Спадзяюся, што ўжо за гэты месяц мы будзем разлічвацца са спажытыя газ і электраэнергію расійскімі рублямі. Такім чынам мы пазбавімся валютных рызык, звязаных са змяненнямі курсаў. А разам з гэтым атрымаем упэўненасць у стабільнай рабоце Обальскага керамічнага завода».
Аляксандр ШЭДЗЬКО.
Надрукавана ў №27 ад 12.04.2022 г.
