На лыжню! На каток!
Канец лістапада выдаўся не па-восеньску снежным, што стала сапраўдным падарункам для аматараў лыж. На гарадскім стадыёне лыжню праклалі ў мінулыя выхадныя, і пасля снегападаў яна задавальняе самых патрабавальных лыжнікаў.
Калі ў некага яшчэ няма лыж – на дапамогу прыйдзе пракат фізкультурна-аздараўленчага цэнтра, які працуе з 9.00 да 21.00. Дзецям адна гадзіна карыстання лыжамі абыдзецца ў 2 рублі, дарослым – у 2 рублі 20 капеек.
Як расказала дырэктар ФАЦ Ларыса Маладзечкіна, у сераду на гарадскім стадыёне пачалі заліваць каток. Калі захаваюцца маразы, на наступным тыдні можна будзе катацца і на каньках. Дарэчы, у пракаце чакаюць аматараў актыўнага адпачынку амаль 40 пар канькоў. Кошт на іх такі ж, як і на лыжы.
Алесь САКАЛОЎ.