15 сакавіка шумілінцы разам з усёй краінай адзначылі Дзень Канстытуцыі ўручэннем пашпартоў юным грамадзянам рэспублікі, чэмпіянатам па хуткаснай зборцы спіл-карты Беларусі, выставамі і акцыямі.
У раённы цэнтры культуры, дзе праходзілі галоўныя святочныя мерапрыемствы, сабраліся прадстаўнікі раённых уладаў, члены Маладзёжнага парламента Шумілінскага раёна, школьнікі і педагогі, актывісты грамадскіх аб’яднанняў, ідэолагі арганізацый і прадпрыемстваў. У фае цэнтра былі разгорнуты інтэрактыўныя выставы-прэзентацыі «Галоўны закон краіны – Канстытуцыя» ад раённай бібліятэкі, «Фінансавая граматнасць» ад «Беларусбанка», святочныя паштоўкі, газеты і часопісы прапаноўваў раённы ўчастак паштовай сувязі, райаддзел МНС нагадваў правілы бяспечных паводзін.
Ведай сваю краіну
Раённая арганізацыя грамадскага аб’яднання БРСМ правяла камандны чэмпіянат па хуткаснай зборцы спілс-карты Беларусі. Шэсць каманд па пяць чалавек – ад Маладзёжнага парламента і сярэдніх школ раёна – складвалі карту нашай краіны са 118 фрагментаў-раёнаў. Чэмпіёнам стала каманда «Пілігрымы» Шумілінскай СШ № 2 імя А. І. Дубасарскага – падлеткі справіліся з заданнем за 1 хвіліну 47 секунд. На другім месцы каманда «Зорачкі» Шумілінскай СШ № 1 імя Героя Савецкага Саюза П. А. Акуцыёнка (2 хвіліны 41 секунда), трэцяе месца ў каманды «Обаль-сіці» Обальскай СШ імя Героя Савецкага Саюза З. М. Партновай (2 хвіліны 47 секунд).
Усебеларуская акцыя
Кульмінацыяй святочных мерапрыемстваў стала традыцыйная ўсебеларуская акцыя «Мы – грамадзяне Рэспублікі Беларусь», падчас якой пашпарты грамадзян Рэспублікі Беларусь былі ўручаны 13 школьнікам, якім споўнілася 14 год.
Старшыня раённага Савета дэпутатаў Мікалай Будневіч адзначыў:
– Вось ужо год дзейнічае абноўленая Канстытуцыя Рэспублікі Беларусь. Ёсць сімвалы дзяржавы – герб, сцяг, гімн, сярод іх і Канстытуцыя – Асноўны закон, які вызначае напрамкі развіцця дзяржавы, дае гарантыі грамадзянам на працу, адукацыю, ахову здароўя і іншыя, але пры гэтым накладае на грамадзян абавязкі, якія неабходна выконваць.
Наша дзяржава маладая, але яна мае глыбокія гістарычныя карані. Таму сёння, уручаючы маладым грамадзянам краіны пашпарты, хачу выказаць ім самыя добрыя пажаданні і ўпэўненасць у тым, што яны будуць годнымі прадаўжальнікамі спраў бацькоў і дзядоў, будуць годна выконваць свае абавязкі грамадзяніна.
Старшы інспектар групы на грамадзянстве і міграцыі РАУС Фёдар Пастаялкін уручыў юным шумілінцам пашпарты, а Мікалай Будневіч – падарунак Прэзідэнта Рэспублікі Беларусь кнігу «Я – грамадзянін Рэспублікі Беларусь».
Да віншаванняў далучыўся начальнік аддзела ідэалагічнай работы, культуры і па справах моладзі райвыканкама Руслан Матвейчук, які ад імя раённай арганізацыі РГА «Белая Русь» павіншаваў усіх з дзяржаўным святам. Ён падкрэсліў, што ў традыцыях «Белай Русі» адзначаць найбольш актыўных грамадзян і ўручыў падарунак вучаніцы Амбросавіцкай школы Марыне Куляшовай, якая актыўна ўдзельнічае ў грамадскім жыцці школы, а 15 сакавіка адзначае дзень нараджэння.
Музычныя віншаванні для ўдзельнікаў мерапрыемстваў падрыхтавалі артысты раённага цэнтра культуры.
Сяргей ЕРМАЛАЕЎ.
