Гэта вынік напружанай працы
Тое, што вучоба – штодзённая, складаная і напружаная работа, ведаюць усе. І найвышэйшая адзнака – заканамерны вынік такой працы. Сёлета ў нашым раёне ёсць выпускніцы СШ №1 г. п. Шуміліна, якія на цэнтралізаваным экзамене набралі 100 і 99 балаў. Мы сустрэліся з дзяўчатамі і пагаварылі пра іх уражанні, спадзяванні і пра тое, як яны ішлі да гэтага бліскучага выніку.
Аліна КУЧМАРОВА па выніках цэнтралізаванага экзамену па фізіцы набрала 100 балаў.
– Я чакала такі вынік, бо вельмі старанна рыхтавалася да экзамену. Рэпетыцыйныя тэсціраванні здала на 95 і 99 балаў. Вельмі многа займалася самастойна, дапамагала настаўніца Наталля Анатольеўна Бурэль. Літаральна кожны дзень рыхтавалася, карысталася дадатковай літаратурай, – расказала Аліна.
— Ці можна падрыхтавацца да ЦТ толькі з дапамогай школьных падручнікаў?
— Думаю, што можна, калі вучыцца і вучыць прадмет. Але мае падручніка было мала. Я фізікай пачала захапляцца ў 9 класе, мне падабаецца гэтая навука. Мяркую паступаць на фізічны факультэт Беларускага дзяржаўнага ўніверсітэта, таму зараз з хваляваннем чакаю вынік ЦТ па матэматыцы, які пакуль невядомы.
Крыўдна, але ўсяго аднаго бала да 100 на ЦЭ па грамадазнаўстве не хапіла Уладзіславе ШЧАРБАКОВАЙ.
— Канешне, за такім вынікам стаіць напружаная вучоба, асабліва апошні навучальны год. Вучылася ў школе, дадаткова займалася з рэпетытарам, праштудзіравала незлічоную колькасць тэстаў, – расказала Улада.
— Ці ведаеш, дзе дапусціла памылку?
— Ведаю, гэта пытанне было ў пачатку тэста. Я да апошняга вагалася паміж двума адказамі. Выбрала, як аказалася, няправільны.
— Куды плануеш паступаць?
— Я выбрала прафесію юрыста. Мару паступаць у БДУ, але будзем глядзець на прахадныя балы.
Пажадаем поспехаў нашым выпускнікам!
Сяргей ЕРМАЛАЕЎ
