Атрымаў рабочую спецыяльнасць на курсах
Яўген Зінкевіч з Бываліна некалькі гадоў “калясіў” па розных гарадах Беларусі і Расійскай Федэрацыі, дзе працаваў на будаўніцтве. У пачатку года задумаў прыпыніцца ў раёне, каб быць разам з сям’ёй.
Знаёмыя падказалі Яўгену, што для атрымання рабочай спецыяльнасці можна звярнуцца ва ўпраўлення па працы, занятасці і сацыяльнай абароне райвыканкама. Там яму дапамаглі. Выбраў прафесію механізатара, бацька ўсё жыццё адпрацаваў на трактары.
«У пачатку красавіка я паехаў на курсы ў пасёлак Акцябрскі, што ў Віцебскім раёне, – расказаў Яўген. – Мне бясплатна прадаставілі жыллё ў інтэрнаце. Жыў у пакоі адзін, ніхто не перашкаджаў рыхтавацца да заняткаў. Вучыцца было цікава. Практыку два з паловай месяца праходзіў у Мішневіцкім лясніцтве. Пасля рыхтаваўся да экзаменаў. Здаў з першага разу без адзінай памылкі. І ў кастрычніку ўжо ўладкаваўся механізатарам у Мікіціхінскае лясніцтва».
Яўген Зінкевіч працуе на МТЗ-82 з маніпулятарам, вывозіць з лесу на край поля бярвенні. «Я задаволены вучобай і тым, што атрымаў механізатарскія правы. Задаволены і работай», – кажа ён.
Якія спецыяльнасці можна атрымаць на курсах? Рабочых прафесій многа, карыстаюцца папулярнасцю курсы аператараў кацельні, механізатараў, вальшчыкаў, прадаўцоў, цырульнікаў, повараў, слесараў, токараў. У раёне сёлета на курсах «Асновы прадпрымальніцкай дзейнасці і бізнес-планавання» вывучылася жыхарка раёна, пасля атрымала дзяржаўную субсідыю і адкрыла сваю справу.
«Жадаючыя вучыцца ёсць і на наступны год, – расказала галоўны спецыяліст упраўлення па працы, занятасці і сацыяльнай абароне райвыканкама Людміла Сямагіна. – Адзін жыхар раёна пажадаў атрымаць спецыяльнасць слесара-сантэхніка ці аператара кацельні, яшчэ адзін – электраманцёра ці аператара кацельні. Дзяўчына, якая зарэгістравана ў адной з вёсак раёна, а пражывае ў Віцебску, хоча вывучыцца на вадзіцеля трамвая. Усе заяўкі будуць задаволены. Грошы на вучобу выдзяляюцца са сродкаў бюджэту дзяржаўнага пазабюджэтнага фонду сацыяльнай абароны насельніцтва Рэспублікі Беларусь».
Ларыса ЗАЙЦАВА.
