Прастора памяці. Як Шумілінскі раён рыхтуецца да Дня Перамогі
Падрыхтоўка да 81‑й гадавіны Перамогі ў Вялікай Айчыннай вайне ў нашым раёне выходзіць на фінальную стадыю. Гэты працэс даўно перастаў быць фармальнасцю: ён стаў важнай часткай работы па захаванні гістарычнай памяці і павагі да тых, хто перажыў вайну і заваяваў мір і свабоду. Тэма падрыхтоўкі да самага вялікага, значнага і любімага ўсімі пакаленнямі свята заўсёды знаходзіцца ў цэнтры ўвагі ўлады. Вось і на апошнім пасяджэнні прэзідыума раённага Савета дэпутатаў пад старшынствам Руслана Матвейчука пытанне было падрабязна абмеркавана. Інфармацыю падрыхтавала начальнік аддзела ідэалагічнай работы і па справах моладзі райвыканкама Вольга Шаўнёва.
У цэнтры ўвагі – людзі, якія перажылі вайну
Штогод у нашай краіне 9 мая адзначаецца вялікае свята – Дзень Перамогі – і раён імкнецца напоўніць яго рэальным зместам. У цэнтры ўвагі – людзі, якія перажылі вайну. Па дадзеных упраўлення па працы, занятасці і сацыяльнай абароне райвыканкама, зараз у раёне пражываюць 10 чалавек, якія пацярпелі ад наступстваў вайны. Сярод іх – адзін ветэран і інвалід Вялікай Айчыннай вайны, адзін інвалід з дзяцінства з прычыны кантузіі, а таксама восем былых вязняў канцлагераў.
Сацыяльныя службы абследавалі ўмовы жыцця ўсіх гэтых грамадзян. Прамых просьбаў аб дапамозе не паступіла, аднак адрасная падтрымка аказана: напрыклад, Ганне Піліпаўне Бучкінай устаноўлены пажарны апавяшчальнік, а Раісе Антонаўне Сафонавай прадастаўляюцца паслугі сацабслугоўвання на даму. Да Дня Перамогі прадугледжаны і аднаразовыя выплаты: ветэрану вайны – 5000 руб., астатнім пацярпелым ад наступстваў айны – па 1500 руб.
Памятныя мясціны – пад пастаянным кантролем
Шумілінскі раён валодае значнай мемарыяльнай спадчынай: 63 аб’екты, дзе спачываюць 12 188 чалавек, з іх 2265 – невядомыя. Работа па доглядзе за імі вядзецца не толькі напярэдадні 9 мая, а паслядоўна і пастаянна. За 132 помнікамі замацаваны адказныя арганізацыі. Да 1 мая камісіі правядуць чарговую інвентарызацыю воінскіх пахаванняў. Асаблівая ўвага – зверцы дадзеных на мемарыяльных плітах, асабліва пры вырабе новых. У гэтым годзе на рамонт і ўтрыманне памятных аб’ектаў прадугледжана 10 тысяч рублёў па дзяржпраграме «Камфортнае жыллё і спрыяльнае асяроддзе».
Святое свята
Раён па традыцыі рыхтуе насычаную праграму. Сярод ключавых падзей: велапрабег «Дарогамі Перамогі», акцыя «Парад пад акном», шэсце «Беларусь памятае. Памятаем кожнага», мітынг «Жаночыя лёсы вайны», канцэрт «Музычны фронт. Песні, з якімі мы перамаглі», маладзёжная акцыя «Свеча памяці» і інш.
Асобнай увагі заслугоўвае міжнароднае супрацоўніцтва з Велікалуцкім раёнам Расійскай Федэрацыі. У пачатку мая дэлегацыя раёна прыме ўдзел ва Усерасійскім свяце франтавой паэзіі.
Памяць як частка ідэнтычнасці
З пачатку года ў арганізацыях і ўстановах праходзяць тэматычныя мерапрыемствы, рэалізуюцца праекты. Галоўная мэта ўсёй работы – нагадаць кожнаму чалавеку, што Дзень Вялікай Перамогі сёння для беларусаў застаецца святым святам. Гэта не проста даніна традыцыі – гэта спосаб захаваць сувязь пакаленняў і павагу да тых, хто абараніў свет.
Па абмеркаваным пытанні прынята пастанова з вызначэннем задач, тэрмінаў выканання і адказных службаў.
Алена КАРПУШЭНКА.
