Мнагадзетныя сем’і атрымаюць дапамогу да навучальнага года
Да новага навучальнага года мнагадзетным сем’ям будзе аказана аднаразовая матэрыяльная дапамога на кожнага вучня, які вучыцца ва ўстановах агульнай сярэдняй і спецыяльнай адукацыі.
Такое рашэнне – «Аб мерах сацыяльнай падтрымкі да 2026/2027 навучальнага года сем’ям, якія выхоўваюць трох і больш дзяцей» – прыняў Шумілінскі раённы Савет дэпутатаў 19 чэрвеня 2026 года. Размер дапамогі складзе 30% бюджэту пражытачнага мінімуму ў сярэднім на душу насельніцтва, які будзе дзейнічаць на 1 жніўня (за выключэннем апякунскіх, прыёмных сямей і дзіцячых дамоў сямейнага тыпу).
Матэрыяльная дапамога будзе прадастаўляцца з 1 жніўня згодна з рэгістрацыяй па месцы жыхарства на падставе:
асабістай заявы аднаго з бацькоў;
дакумента, якія сведчыць асобу заяўніка;
пасведчання мнагадзетнай сям’і (арыгінал і копія);
даведкі пра месца жыхарства і склад сям’і;
даведак з устаноў адукацыі аб навучанні на кожнага вучня (з указаннем класа на 1 верасня 2026 года);
выпіскі банкаўскага рахунка Беларусбанка ці Белаграпрамбанка (на імя заяўніка), на які будзе пералічана выплата.
Дзяржаўную падтрымку ў выглядзе дзяржаўнай адраснай сацыяльнай дапамогі змогуць атрымаць таксама малазабяспечаныя сем’і, сем’і з дзецьмі-інвалідамі альбо з бацькамі-інвалідамі.
Выплата дапамогі не прадугледжана на дзяцей, якія вучацца ў прафесійна-тэхнічных, вышэйшых і сярэдніх спецыяльных навучальных установах.
Дакументы да 4 верасня прымаюцца па адрасе: г. п. Шуміліна, вул. Юбілейная, д. 8, каб. 17, Тэрытарыяльны цэнтр сацыяльнага абслугоўвання насельніцтва. Час работы цэнтра – з 8.00 да 13.00 і з 14.00 да 17.00, серада – з 8.00 да 13.00 і з 14.00 да 20.00, выхадныя – субота і нядзеля. Тэлефон для даведак 5-71-88.
Алена КАРПУШЭНКА.
