Наталля ВАРАБ’ЁВА і Сяргей БОЛДЫШАЎ працуюць жывёлаводамі на ферме Башні ААТ «АграБаравінка». У прафесіі кожны з іх ужо больш за дваццаць гадоў, і аб’ядноўваюць іх не толькі агульная справа, але і адказнасць, любоў да жывёлы і гатоўнасць у любы час прыйсці на дапамогу, кажа дырэктар гаспадаркі Віктар Каўхута.
Наталля даглядае групу цялят ад трох да шасці месяцаў – больш за сотню галоў, клапоціцца пра сваіх падапечных, сочыць за чысцінёй і парадкам.
У Сяргея Болдышава пад апекай больш за 180 цялят, кожнае з якіх важыць больш за сто кілаграмаў. І ён гэтак жа ўважліва сочыць за ўмовамі ўтрымання жывёлы.
Праца жывёлавода патрабуе цярпення, уважлівасці і штодзённага клопату. Наталля і Сяргей ведаюць: калі побач надзейны калега, справіцца з любой задачай лягчэй.

