«Цяпер я трактарыст-машыніст трэцяга класа»
Павел КАНСТАНЦІНАЎ з Язвіна меў даўнюю мару вывучыцца на трактарыста. Пасля заканчэння школы ён не паступаў у навучальныя ўстановы, не меў спецыяльнасці і амаль дзесяць год працаваў у мясцовым сельгаспрадпрыемстве і іншых арганізацыях рабочым. Таму быў вельмі задаволены, калі ад упраўлення па працы, занятасці і сацыяльнай абароне райвыканкама яго адправілі на механізатарскія курсы ў Віцебск.
«Вучыўся на трохмесячных курсах пры Віцебскім прафесійна-тэхнічным каледжы ельскагаспадарчай вытворчасці, – расказаў Павел. – Вучоба і пражыванне ў інтэрнаце былі бясплатнымі. Сэканоміў больш за паўтары тысячы рублёў. Бясплатныя курсы – добры бонус добра вучыцца.
У мяне былі выдатныя выкладчыкі, ды і я сур’ёзна рыхтаваўся да экзаменаў і здаў усе іспыты з першага разу. Цяпер я трактарыст-машыніст трэцяга класа. Была дамоўле насць з кіраўніцтвам ААТ “АграБаравінка”, што мяне возьмуць на работу. Летам я працаваў на МТЗ-82: вазіў сянаж, ваду для хімпраполкі. Механізатары Вячаслаў Дубінін і Віктар Вясна дапамагалі мне, падказвалі. Зараз часова працую на ферме слесарам. А вясной зноў перасяду на трактар. Хачу сябе паспрабаваць на ворыве, на баранаванні. У будучым думаю павышаць класнасць і адкрываць іншыя катэгорыі: на энерганасычаныя трактары і на камбайны».
Павел Канстанцінаў не адзіны ў раёне, хто вывучыўся на курсах ад упраўлення па працы, занятасці і сацыяльнай абароне райвыканкама. Такую магчымасць у мінулым го-дзе скарысталі яшчэ сем чалавек. Двое вывучыліся на прадаўцоў, столькі ж – на курсах па бяспечных метадах работы з газонакасілкамі і кустарэзамі. Адзін мужчына атрымаў спецыяльнасць рабочага па комплексным абслугоўванні будынкаў і збудаванняў. Яшчэ адзін закончыў курсы па асновах прадпрымальніцкай дзейнасці і бізнес-планаванні. Пасля ўзяў субсідыю, зарэгістраваўся індывідуальным прадпрымальнікам і плануе займацца рознічным гандлем аўтамабільных дэталяў, вузлоў і прылад для аўтамабіляў. Яшчэ адзін працягвае вучыцца на вальшчыка лесу.
«Важным накірункам дзейнасці ўпраўлення па працы, занятасці і сацыяльнай абароне райвыканкама з’яўляецца абучэнне беспрацоўных грамадзян у рамках Дзяржаўнай праграмы “Рынак працы і садзейнічанне занятасці”, якая рэалізуецца ў 2021-2025 гадах, – расказала галоўны спецыяліст упраўлення Людміла Сямагіна. – Мы накіроўваем на бясплатныя курсы ўсіх жадаючых беспрацоўных. Прафесіі запатрабаваныя, таму пасля вучобы працаўладкаванне гарантаванае.
Тут няма абавязковай адпрацоўкі, і працаўладкавацца можна ў любым населеным пункце краіны. Грошы на вучобу выдзяляюцца за кошт сродкаў бюджэту дзяржаўнага пазабюджэтнага фонду сацыяльнай абароны насельніцтва. Летась, напрыклад, на абучэнне васьмі чалавек пайшло 3,8 тысячы рублёў».
Ларыса ЗАЙЦАВА.
