Новае аблічча аддзялення пошты
Сфера паслуг Обалі імкнецца ісці ў нагу з часам, радуючы жыхароў не толькі якасным абслугоўваннем, але і сучасным прывабным выглядам сваіх аб’ектаў. Набывае новае аблічча паштовае аддзяленне сувязі.
Афарбоўкай фасада займалася брыгада Шумілінскай ПМК-70. Цяпер пошта сустракае наведвальнікаў абноўленай і сучасна аформленай. На гэтым добраўпарадкаванне не закончана – зараз будаўнікі робяць адмостку.
Як расказала загадчыца паштовага аддзялення сувязі Алена Будневіч, папярэдне была праведзена немалая работа: прыбіралі старыя клумбы, высякалі кусты. Пасля завяршэння будаўнічых работ тэрыторыю вызваляць ад лішняга грунту, падсыпяць і выраўняюць для далейшага азелянення. У планах – адрамантаваць лавачку і ганак.
Галоўным упрыгожваннем абноўленай тэрыторыі абяцае стаць арыгінальны арт-аб’ект – тут мяркуюць устанавіць эксклюзіўную паштовую скрыню для карэспандэнцыі, выкананую ў форме стылізаванага цягніка.
Адным словам, аб’ект сэрвісу і паслуг у гэтым годзе ператворыцца ў сучасную і крэатыўную прастору.
Ларыса КІСЯЛЁВА
