«АграБаравінка» будзе вырошчваць грэчку
Роўненькімі радочкамі на палетках ААТ «АграБаравінка» ўсходзяць зерневыя, якія поўнасцю ўжо адсеялі. Зараз на палетках ідзе сяўба грэчкі.
Сталыя механізатары «АграБаравінкі» помняць, што ў 90-ыя гады ў гаспадарцы спрабавалі сеяць грэчку. Але па шэрагу прычын зноў перайшлі толькі на зерневыя. І дарэмна, лічыць дырэктар сельгаспрадпрыемства Яўген Мурашка.
«Як паказаў вопыт мінулага года, грэчку трэба вырошчваць – гэта справа выгадная, – працягвае ён. – У мінулым годзе мы атрымалі на круг 15 цэнтнераў з гектара. Здалі зерне ў кошт дзяржзаказу і пакінулі сабе на насенне. Тону грэчкі летась прадавалі па 700 рублёў, а зерне – па 300 рублёў. Як бачыце, розніца істотная. Галоўнае пры вырошчванні грэчкі – своечасова зрабіць хімпраполку. Прычым, летась дастаткова было адной».
Разам з начальнікам участка Аляксандрай Міраненка накіроўваемся ў далёкае ўрочышча Хвостава, дзе на МТЗ з сеялкай працуе мясцовы механізатар Вячаслаў Дубінін. Ён расказаў, што глебу падрыхтаваў да сяўбы Пётр Баранаў на трактары з дыскатарамі. Задача Вячаслава – засяваць. «Ужо гатовы 41 гектар ва ўрочышчы Грынёва, – удакладняе механізатар. – Астатнія 129 гектараў будуць расці ў Хвоставе. Усяго сёлета грэчкі засеем 170 гектараў – гэта ў 1,7 раза больш, чым летась».
Гаспадарка засявае гатунак “купава”, ён сярэдняспелы, устойлівы да палягання, асыпання і засухі і ўключаны ў спіс найбольш каштоўных па якасці сартоў крупяных культур.
Ларыса ЗАЙЦАВА.
