Без перамог
Заключнага матча рэгіянальнага этапа другой лігі чэмпіянату Беларусі, які прайшоў 6 верасня на гарадскім стадыёне ў Шуміліне, з нецярпеннем чакалі футбольныя заўзятары. Верылі, што ФК «Шуміліна» на родным полі здабудзе першую перамогу і пакіне апошні радок у турнірнай табліцы групы С. Тым больш, што сапернік – «Дзвіна» (Бешанковічы) – быў яўна «па зубах». Але ж…
Фактычна, як толькі прагучаў стартавы свісток, ФК «Шуміліна» прапусціў гол. Далей шумілінцы ўзялі ініцыятыву ў свае рукі, пачалі ствараць моманты каля гасцявых варот. У адной з атак, у штрафной сфолілі на нападаючым Яўгене Калеснікаве, пенальці рэалізаваў Арцём Багаеў. 1:1 – лік пасля першага тайма даваў надзею, што ўсё будзе добра. Тым больш, што другія таймы ў нашых футбалістаў у сезоне выдаваліся годнымі. Толькі вось не на гэты раз. Адразу неяк гульня ў шумілінцаў не задалася. А пасля замены актыўнага ў нападзенні Яўгена Калеснікава малюнак зусім згубіўся. Затое бешанковіцкія футбалісты былі ў форме: падчас адной з атак заштурхалі мяч у шумілінскія вароты. Здавалася, што гаспадары і спрабуюць нешта зрабіць, але нічога не атрымлівалася. А пасля таго, як лік стаў 1:3, у шумілінскіх балельшчыкаў было адно жаданне: хутчэй бы фінальны свісток.
Паражэнне з лікам 1:3 пакінула ФК «Шуміліна» на апошнім радку ў групе.
Аляксандр ШЭДЗЬКО.
| № | Каманда | гульні | перамогі | нічыі | паражэнні | мячы | ачкі |
| 1 | «Ураджай» (Докшыцы) | 12 | 8 | 2 | 2 | 31-21 | 26 |
| 2 | “Шаркоўшчына” | 11 | 6 | 2 | 3 | 31-20 | 20 |
| 3 | «Партызан» (Ушачы) | 12 | 6 | 2 | 4 | 35-24 | 20 |
| 4 | «Дрывяціч» (Браслаў) | 12 | 6 | 1 | 5 | 30-29 | 19 |
| 5 | «Лёзна» | 10 | 2 | 4 | 4 | 18-23 | 10 |
| 6 | «Дзвіна» (Бешанковічы) | 11 | 2 | 4 | 5 | 21-35 | 10 |
| 7 | «Шуміліна» | 12 | 0 | 5 | 7 | 14-28 | 5 |
