Прыгожы 20-гадовы юбілей адзначыў узорны хор Шумілінскай дзіцячай школы мастацтваў пад кіраўніцтвам нязменнага лідара і натхняльніка Алены Сініцкай.
Гонар школы, узор прафесійнага творчага калектыву, майстэрства найвышэйшага ўзроўню – гэтыя выдатныя эпітэты гучалі ўвесь вечар пятніцы ў адрас юбіляра. У актавай зале школы быў аншлаг. Гледачы занялі свае месцы ў прадчуванні юбілейнага канцэрта, каб атрымаць асалоду ад маштабнага жывога выканання таленавітых шумілінскіх музыкантаў.
Больш за 30 чалавек уваходзіць у склад калектыву. Гэта вучні школы, выпускнікі і педагогі. У іх ва ўсіх розныя галасы: хтосьці па-майстэрску валодае альтам, хтосьці мае чароўны сапрана. Але калі Алена Сініцкая падымае ўверх рукі і робіць імі загадкавыя ўзмахі, не зусім зразумелыя гледачу, галасы ўдзельнікаў хору зліваюцца разам і адбываецца сапраўдная магія.
«Алілуя» стала першай музычнай кампазіцыяй, якую выканаў хор, адразу ж прымусіўшы гледача захапіцца лёгкасцю, пяшчотай і меладычнасцю галасоў. Гэта была сапраўдная ўдзячная сумесная малітва Богу «за месячнае святло, за дзівосны свет іншых планет, за радасць, сум, за святло і цень, за самы лепшы ў свеце Дзень». Яе неверагоднае ўспрыманне складана перадаць словамі, гэта трэба чуць і ў моманце бачыць вочы спевакоў, якія пражываюць гэтыя глыбокія радкі, прапускаючы праз сябе.
Рэпертуар узорнага хору падарыў гасцям вечара шмат кампазіцый: «Святло», «Радзіма», «Пра што мараць дзеці на планеце», народную песню «У сырам бары сцяжына», яркія «Шалом-алейхем», «Час выбраў нас». Усе яны былі настолькі рознымі па настроі, што ў галаве была толькі адна думка – магчымасці чалавечага голасу бязмежныя.
Павіншаваць любімы калектыў у гэты дзень прыйшлі тыя, хто на працягу многіх гадоў сочыць за яго поспехамі. У ліку самых адданых прыхільнікаў хору былі прадстаўнікі раённай улады: старшыня раённага Савета дэпутатаў Руслан Матвейчук і намеснік старшыні райвыканкама Ірына Шалахава. Яны цёпла і шчыра падзякавалі Алену Сініцкую і ўсіх удзельнікаў калектыву за іх высокае майстэрства і вернасць мастацтву. «Ваш калектыў на працягу многіх гадоў радуе сваіх гледачоў цудоўнымі выступленнямі, дзякуючы таленту і прафесіяналізму кожнага ўдзельніка мы можам чуць сапраўдную музыку, у кожнай песні ёсць глыбіня, энергія і прыгажосць мелодыі», – адзначыў Руслан Алегавіч і ўручыў кіраўніку хору Алене Сініцкай падзяку Шумілінскага раённага Савета дэпутатаў.
Падрастаючае пакаленне таксама прыйшло павіншаваць сваіх старэйшых таварышаў. Малодшы хор ДШМ пад кіраўніцтвам Вольгі Куст падрыхтаваў для віноўнікаў свята вясёлую песеньку, у якой дзеці паабяцалі ледзь-ледзь падрасці і ў хуткім часе прыйсці на змену.
Сюрпрызам для ўсіх прысутных і асабіста для Алены Сініцкай сталі аўдыяпрызнанні былых выпускнікоў. Некаторыя з іх прыехалі ў родную школу мастацтваў, каб асабіста павіншаваць хор і любімага настаўніка. «Вы прывілі любоў да музыкі на ўсё жыццё; дзякуй, што былі ў маім жыцці; вашы ўрокі – гэта знак якасці!» – казалі выпускнікі.
А потым усе разам гэта даказалі і, зымправізаваўшы, выканалі песню «Дружба моцная не зламаецца».
20 гадоў – узрост сталасці і пачатак для вялікага творчага шляху. Калі настаў час ставіць новыя мэты і загадваць жаданні, павіншаваць калектыў з тортам выйшла дырэктар школы Алена Сцяпанава. Алена Уладзіміраўна пажадала хору салодкага жыцця і ўручыла падарунак – мікрафон, які цяпер дазволіць запісваць вакал прама ў сценах школы.
Кранальным момантам сталі словы ў адказ Алены Сініцкай. Яна падзякавала ўсім: вучням, іх бацькам, калегам, кіраўніцтву раёна і дзіцячай школе мастацтваў. Але самыя важныя словы Алена Міхайлаўна сказала сваёй сям’і, без падтрымкі і разумення якой нічога б не атрымалася. Сын Максім з жонкай гэтак жа ў гэты вечар былі разам з мамай. Яна – іх гонар. Толькі для яе ў гэты вечар гучалі добрыя і цёплыя словы, былі падораны шчырыя абдымкі і самыя прыгожыя кветкі.
Дар’я ЧАПУРНОВА
