Шумілінская каманда (Яраслаў Канстанцінаў, Павел Лінкевіч, Даніла Акуцёнак, Андрэй Сідарэнка, Арсеній Кулікаў, Марк Ягораў, Павел Пушноў, Мікіта Аксёнаў, Дзмітрый Талстой, Цімур Савва, Міхаіл Карнілаў, Дзмітрый Ярыга і Дзяніс Літвін, трэнеры Аляксей Паршыкаў і Любоў Бабова) паказала выдатную гульню і стала чэмпіёнам Віцебскай вобласці па валейболе сярод юнакоў 2011-2012 гадоў нараджэння і маладзей.
За перамогу змагаліся 6 мацнейшых каманд Віцебшчыны: Шуміліна, Віцебск, Орша, Глыбокае, Паставы і Бешанковічы. Чатыры дні ў Шумілінскай СДЮШАР сталі сапраўдным падарункам для валейбольных заўзятараў: напружаныя і непрадказальныя сустрэчы, горыч паражэнняў і радасць перамог, надзейная гульня ў абароне і відовішчнае нападзенне, яркая гульня лідараў каманд і нестандартныя хады трэнераў, і самае важнае для шумілінцаў – перамогі любімай каманды.
У першыя два гульнявыя дні шумілінскія валейбалісты ў прыгожым стылі абыгралі аршанскую, пастаўскую і бешанковіцкую каманды, у той жа час на рахунку каманды з Глыбокага былі перамогі над Паставамі, Оршай і Віцебскам.
Так што сустрэча ў суботу па факце стала фінальнай. І сцэнарый гульні выдаўся драматычным. Адразу лідарства захапілі глыбоцкія валейбалісты, шумілінцы даганяюць і літаральна вырываюць перамогу ў першай партыі, дадаем другую партыю і выцягваем трэцюю. Ды і заключная, чацвёртая, была не з лёгкіх. Але гэта была перамога – баявая і рабочая.
Цікавым быў і заключны дзень першынства. Так, напрыклад, віцябляне далі сапраўдны бой чэмпіёнам – сустрэча завяршылася з лікам 3:2 на карысць шумілінцаў, а бешанковіцкая каманда на роўных гуляла з глыбоцкай, якая ў выніку стала другой.
Аляксандр ШЭДЗЬКО.
