«Дзякуй за самаахвярную працу»
У Шумілінскім раёне працягваецца рэспубліканская дабрачынная акцыя «Ад усёй душы». Яе мэта – падарыць увагу, клопат і часцінку цяпла людзям старэйшага пакалення, тым, хто сваёй працай і жыццём ствараў аснову сённяшняга дня.
Старшыня райвыканкама Мікалай Будневіч накіраваўся ў вёску Сіроціна, каб павіншаваць з надыходзячым Новым годам і Ражаством ветэрана працы Генадзя Аляксандравіча Ізепчанку, які з свой час працаваў галоўным аграномам калгаса імя Урыцкага і мае шэраг узнагарод. «Галоўнае багацце нашага раёна – гэта людзі. Вы – наш гонар і прыклад для моладзі. Мы бясконца ўдзячныя вам, нашым працаўнікам, ветэранам працы», – падкрэсліў Мікалай Аляксеевіч.
Старшыня раённага Савета дэпутатаў Руслан Матвейчук наведаў старэйшыну вёскі Зямцы ветэрана працы Івана Ягоравіча Апоркіна, славутага меліяратара-экскаватаршчыка, які таксама мае шэраг важкіх узнагарод, каб асабіста павіншаваць яго са святамі. Для Івана Ягоравіча самым каштоўным падарункам сталі добрыя словы, пажаданні здароўя, бадзёрасці і доўгіх гадоў жыцця. Бо ўсё яго жыццё – гэта прыклад сумленнай працы і адданасці роднаму краю. Такія сустрэчы – не проста віншаванні. Гэта знак павагі, падзякі і прызнання тым, хто сваёй працай і сэрцам ствараў будучыню для ўсіх нас.
Алена КАРПУШЭНКА.
