Атрымалі 50 пашпартоў гатоўнасці
Перад усімі арганізацыямі раёна, якія зараз актыўна рыхтуюцца да ацяпляльнага перыяду, стаіць задача да 30 верасня атрымаць пашпарты гатоўнасці.
«У раёне сур’ёзна ідзе падрыхтоўка да асенне-зімовага перыяду, – расказвае інспектар энергагазнагляду Віцебскага МРА філіяла «Энергагазнагляд» Валерый Строкін. – На многіх прадпрыемствах работы па падрыхтоўцы да зімы пачалі адразу пасля завяршэння ацяпляльнага сезона. І самае важнае, што ўсе работы носяць сістэматычны прадуманы характар. Кіраўнікі прадпрыемстваў разумеюць, што якасная работа летам – залог стабільнай работы без надзвычайных сітуацый ў асенне-зімовы перыяд»
Першым у раёне 23 ліпеня пашпарт гатоўнасці атрымаў раённы аддзел па надзвычайных сітуацыях, у гэты ж дзень пашпарт атрымала і цэнтральная аптэка №40. У пачатку жніўня пашпарты атрымалі ДРБУ-204, райветстанцыя, рэдакцыя і ўчастак паштовай сувязі. Па стане на мінулы тыдзень Энергагазнагляд зарэгістраваў 50 пашпартоў гатоўнасці. Усяго ў нашым раёне пашпарты гатоўнасці павінны атрымаць 82 арганізацыі і прадпрыемствы.
Валерый Строкін падкрэслівае, што асноўнымі прычынамі неатрымання пашпартоў гатоўнасці з’яўляюцца няправільнае афармленне дакументацыі і адсутнасць патрэбнай каляровай афарбоўкі абсталявання.
Асаблівая ўвага – УП ЖКГ. Менавіта ў іх найбольш вялікія і сур’ёзныя аб’ёмы падрыхтоўкі да новага ацяпляльнага сезона. І ад якасці іх правядзення залежыць камфорт і цяпло падчас халадоў у нашых з вамі кватэрах і кабінетах. «УП ЖКГ атрымалі пашпарты гатоўнасці 17 цеплакрыніц, – расказвае Валерый Строкін. – Усе кацельні прадпрыемства гатовы да зімы. І гэта вельмі важна». А вось што тычыцца жыллёвага фонду, то пакуль што пашпартоў гатоўнасці, якія павінны быць зарэгістраваны да 20 верасня, няма. Зараз ідуць работы на цеплапунктах шматкватэрных дамоў, у першую чаргу вядзецца цеплаізаляцыя абсталявання і паверка кантрольна-вымяральных прыбораў. Аналізуючы ход падрыхтоўкі цеплапунктаў да асенне-зімовага перыяду, Валерый Строкін канстатуе, што прадпрыемства атрымае ва ўстаноўленыя тэрміны пашпарты гатоўнасці і на жыллёвы фонд.
Аляксандр ШЭДЗЬКО.
Апублікавана ў №69 ад 07.09.2021 г.
