«Экаляты» – першыя крокі юных эколагаў
У Шумілінскім дзіцячым садзе № 1 адбылося адкрыццё экалагічнага атрада
У склад «Экалят» увайшлі шэсць выхаванцаў – юных аматараў прыроды, гатовых вучыцца беражлівым адносінам да навакольнага свету.
Падчас урачыстага адкрыцця атрада малышы далі клятву беражліва адносіцца да жывёльнага і расліннага свету, дапамагаць захоўваць прыродныя багацці і памнажаць іх.
Першым практычным заданнем для «Экалят» стала пасадка саджанцаў дрэў у гадавальнік, які цяпер ёсць у дзіцячым садзе. Заданне юным эколагам даў інжынер па лесааднаўленні і меліярацыі Шумілінскага лясгаса Аляксандр Дуброўскі. Такім чынам выхаванцы не толькі пазнаёміліся з правіламі экалагічнай культуры, але і змаглі прымяніць іх на практыцы.
Як адзначыла загадчыца дзіцячага сада Кацярына Рабушава, наперадзе ў «Экалят» – новыя экалагічныя справы, назіранні за прыродай і ўдзел у мерапрыемствах, накіраваных на ахову навакольнага асяроддзя. Пачатак пакладзены, і першыя крокі юных эколагаў сталі значнай падзеяй у жыцці сада.
Аляксандр ШЭДЗЬКО.
