«Новыя імёны-2022»
Згодна з пастановай Прэзідыума Савета Федэрацыі прафсаюзаў Беларусі «Аб падтрымцы правядзення тэлевізійнага забаўляльнага праекта «Зорны шлях» ва ўсіх абласных цэнтрах краіны прайшлі адборачныя кастынгі. Мерапрыемства ладзілася ў рамках рэспубліканскага прафсаюзнага конкурсу вакальнай творчасці працоўных калектываў «Новыя імёны-2022».
Другі нацыянальны канал (ОНТ) прыступіў да стварэння маштабнага тэлевізійнага праекта «Зорны шлях», які стане галоўнай з’явай новага тэлевізійнага сезона. Прадзюсары і іх каманды, у якія ўваходзяць прадстаўнікі музычнай індустрыі Беларусі, выбралі лепшых самадзейных артыстаў у кожнай вобласці.
Па рашэнні членаў журы ў наступны этап прайшлі 33 удзельнікі з усіх абласцей рэспублікі, расказала старшыня раённай арганізацыі Беларускага прафесійнага саюза работнікаў дзяржаўных і іншых устаноў Таццяна Шчарбакова. У спісе канкурсантаў, якія будуць змагацца за перамогу далей, і наша зямлячка Юлія Якуценка з Шуміліна. Юлія працуе начальнікам аддзела забеспячэння і прававога рэгулявання Цэнтра па забеспячэнні дзейнасці бюджэтных арганізацый Шумілінскага раёна. Яна адзіная ў краіне, хто выступае ад Беларускага прафсаюза работнікаў дзяржаўных і іншых устаноў.
З сярэдзіны верасня да 24 снежня ў Мінску запланаваны рэпетыцыйна-падрыхтоўчы перыяд, у рамках якога будуць праводзіцца заняткі па вакале, рэпетыцыі харэаграфічных пастановак, запісы музычных матэрыялаў у прафесійнай студыі гуказапісу, распрацоўкі сцэнічных вобразаў, стварэнне сцэнічных касцюмаў.
Будзем балець за нашу зямлячку, пажадаем Юліі Якуценка перамогі!
Ларыса ЗАЙЦАВА.
