«Тата можа і ўмее ўсё!»
Леанід Генадзьевіч Лашкоў з аг. Мікіціха амаль тры гады адзін выхоўвае траіх дзяцей. Дзень бацькі – яго свята, клапатлівага, добрага і шчырага, які робіць усё, каб яго дзеці адчувалі цеплыню і падтрымку.
Старэйшай Дашы 16 гадоў, яна вучыцца ў каледжы на агранома, Павел – пяцікласнік, Максім ходзіць у другі клас. Нягледзячы на жыццёвыя абставіны, на тое, што аднаму даводзіцца выхоўваць дзяцей, Леанід не губляе аптымізму. Пачуцці бацькі да дзяцей стрыманыя і ціхія, але іх нічым не замяніць, бо надзейнае бацькоўскае плячо адчуваюць і дачка (першая памочніца Леаніда), і сыны. Яны ведаюць, што тата моцны і надзейны, жыве і працуе дзеля іх.
Уражвае чысціня і ўтульнасць у кватэры. На пытанне, як вучыўся гатаваць, прыбіраць, прасаваць, Леанід толькі ўсміхнуўся: «Жыццё навучыла. Вялікую дапамогу аказвае бытавая тэхніка».
І дзеці ўпэўнены: «Тата можа і ўмее ўсё!».
Леаніда Лашкова, які працуе аператарам другога перыяду жывёлагадоўчага комплексу СУП «Лаўжанскае», з Днём бацькі павіншавала старшыня райкама прафсаюза работнікаў АПК Вольга Пусянкова.
Ларыса ЗАЙЦАВА.
