Датэрмінова маюць права прагаласаваць выбаршчыкі, якія не змогуць прыйсці на ўчасткі 26 студзеня. У перыяд датэрміновага галасавання – з 21 па 25 студзеня – участковыя камісіі працуюць з 12.00 да 19.00 без перапынку.
Парадак галасавання:
- Па прыбыцці ў памяшканне для галасавання выбаршчык прад’яўляе члену ўчастковай выбарчай камісіі дакумент, які сведчыць асобу (гэта можа быць пашпарт, ідэнтыфікацыйная картка, студэнцкі білет, білет навучэнца, вадзіцельскае пасведчанне, ваенны білет – для ваеннаслужачых тэрміновай службы, пенсійнае пасведчанне, пасведчанне інваліда, службовае пасведчанне работніка дзяржоргана, даведка органаў унутраных спраў, якая пацвярджае асобу грамадзяніна) і ставіць подпіс у спісе выбаршчыкаў.
Пасля гэтага яму выдаецца бюлетэнь.
- Атрымаўшы бюлетэнь, выбаршчык праходзіць у кабіну для тайнага галасавання.
- Выбаршчык ставіць знак (напрыклад, птушку) ў пустым квадраце, размешчаным справа ад прозвішча кандыдата, за якога ён галасуе.
- Запоўнены бюлетэнь выбаршчык апускае ў скрыню для галасавання. Па просьбе выбаршчыка сапсаваны бюлетэнь можа быць заменены новым. Але такім правам можна скарыстацца адзін раз.
ВАЖНА!
Выносіць выдадзены бюлетэнь за межы памяшкання для галасавання, а таксама ажыццяўляць фота – і відэаздыманне запоўненага бюлетэня забаронена.
Кожны выбаршчык галасуе за сябе асабіста. Галасаванне за іншых асоб не дапускаецца!
