Шумілінскія юныя праграмісты – лепшыя ў вобласці
Больш чым год у СШ № 1 г. п. Шуміліна працуе інжынерна-тэхнічны цэнтр, якім кіруе настаўніца фізікі Наталля Бурэль. Тут займаюцца дзеці, якія з камп’ютарам, як кажуць, на ты. Ім даспадобы вывучаць мову праграмавання і самім ствараць уласныя камп’ютарныя праграмы. Са сваімі праектамі юныя праграмісты годна выступаюць на абласных спаборніцтвах.
У пачатку сакавіка ў Віцебску прайшлі другі этап абласнога ІТ-рэйтынгу PRO і абласны этап адкрытага рэспубліканскага ІТ-чэмпіянату «РобІН-2025», на якіх добра выступілі шумілінцы.
У абласным этапе адкрытага рэспубліканскага ІТ-чэмпіянату «РобІН-2025» за званне пераможцаў змагалася больш за 50 лепшых юных праграмістаў Віцебшчыны. Шасцікласніца Ганна Бурэль стала адной з пераможцаў абласнога першынства.
Другі этап абласнога ІТ-рэйтынгу PRO сабраў больш за сотню ўдзельнікаў. І тут нашы землякі былі на вядучых пазіцыях. Ганна Бурэль заняла першае месца ў намінацыі «Стварэнне праектаў з дапамогай гульнявых рухавічкоў», дзесяцікласнік Глеб Лаўрыненка і адзінаццацікласніца Аліса Сцержанкова занялі другія месцы ў намінацыі «3D-мадэляванне».– Гэта нашы першыя выступленні на абласных спаборніцтвах, – падсумавала Наталля Бурэль. – Рада за выпускніцу Алісу Сцержанкову. Думаю, гэты поспех дапаможа ёй
і пры выбары прафесіі. А вось Глеб і Ганна свайго апошняга слова не сказалі, упэўнена, што пры такім старанні іх наперадзе чакаюць яшчэ больш гучныя перамогі.
Аляксандр ШЭДЗЬКО
