Дапамагаць, несці міласэрнасць
Справаздачна-выбарная канферэнцыя раённай арганізацыі РГА “Беларускі Чырвоны Крыж”, удзел у якой прыняла намеснік старшыні райвыканкама Ірына Шалахава, прайшла ў Шумілінскім гісторыка-краязнаўчым музеі.
«Раённая арганізацыя налічвае 66 пярвічак, 2622 чалавекі, – расказала ў справаздачы старшыня Таццяна Казакова. – Мы працягваем руку дапамогі інвалідам, мнагадзетным сем’ям, ветэранам, малазабяспечаным, удзельнічаем у дабрачынных акцыях.
Уразлівая катэгорыя грамадзян атрымлівае дапамогу ў выглядзе новага адзення і абутку. Штогод гуманітарная дапамога ад Беларускага Чырвонага крыжа прыходзіць больш як сотні жыхароў раёна». Важны накірунак работы арганізацыі – валанцёрства. Прадстаўнікі валанцёрскай групы “Праменьчык дабрыні” частыя госці Обальскага дзіцячага прытулку, цэнтра карэкцыйна-развіваючага навучання і рэабілітацыі, аддзялення кругласутачнага знаходжання грамадзян сталага ўзросту і інвалідаў ТЦСАН. Дзякуючы сумеснай рабоце старшынь пярвічак, валанцёраў, партнёраў, кіраўнікоў арганізацый і прадпрыемстваў асноўныя мерапрыемствы выкананы.
Ірына Шалахава высока ацаніла работу раённай арганізацыі, параіла больш цесна супрацоўнічаць з людзьмі шаноўнага ўзросту, развіваць валанцёрства, прыцягваць да работы моладзь і мнагадзетных матуль, якія знаходзяцца ў дэкрэтным водпуску.
Старшынёй раённай арганізацыі адзінагалосна абрана Таццяна Казакова. Былі абраны прэзідыум, рэвізійная камісія. Раённая арганізацыя БЧК гатова далей дапамагаць людзям, несці міласэрнасць.
Актывістам арганізацыі – начальніку аддзела па адукацыі райвыканкама Аксане Талстой, галоўнаму бухгалтару ЦРБ Таццяне Шаматурынай, дырэктару Шумілінскага гісторыка-краязнаўчага музея Святлане Івановай, кіраўніку валанцёрскай групы “Праменьчык дабрыні” Ларысе Забаўскай – Таццяна Казакова ўручыла Ганаровыя граматы Віцебскай абласной арганізацыі РГА “Беларускі Чырвоны Крыж”.
Былі абраны дэлегаты на XXVII абласную канферэнцыю Беларускага Чырвонага Крыжа.
Ларыса ЗАЙЦАВА.
