Заданне на лета: пад адным дахам
«Сёлета ў нас вялікі рамонт, фактычна будуюцца два новыя санвузлы», – адзначыла дырэктар Амбрасавіцкай БШ Таццяна Бабарэка падчас экскурсіі па школе. – 1 верасня вучні ўвойдуць у абноўлены будынак: на першым паверсе будуць група і спальны пакой дзіцячага сада, першы клас, бібліятэка і школьны музей «Беларуская хатка», а другі паверх цалкам аддадзены пад школьныя класы. Аддзяленне дашкольнікаў пад адным дахам са школай – гэта камфорт для бацькоў і плаўны пераход дзяцей у школу».
«Галоўны акцэнт ў рамонце – санвузлы, якія будуць цалкам адпавядаць санітарна-гігіенічным патрабаванням. З бюджэту на гэтыя работы выдаткавана каля 115 тысяч рублёў. Зараз вядуцца будаўнічыя работы», – расказала начальнік аддзела па адукацыі райвыканкама Аксана Талстая.
У школе працягваецца касметычны рамонт класаў. Выконваецца ён сіламі педагогаў і бацькоў. «Кожны клас – своеасаблівы сімвал сумеснай работы, – дадае дырэктар школы, паказваючы светлыя класы з новымі аздабленнямі. – З пазабюджэтных сродкаў на рамонт выдзелілі адну тысячу рублёў, яшчэ 500 рублёў – спонсарская дапамога».
У планах школы – рамонт адмосткі будынка. Аддзел па адукацыі райвыканкама для гэтага закупіў адну тону цэменту. Работы будуць выкананы сіламі работнікаў школы.
Плануецца, што ў новым навучальным годзе ў Амбрасавіцкай БШ будзе навучацца і выхоўвацца 60 дзяцей.
Аляксандр ШЭДЗЬКО
