Тармазіць, аб’ехаць ці ісці на таран?
На мінулым тыдні на аўтадарозе Р‑20 (каля павароту на Добрына) зарэгістраваны наезд аўтамабіля на дзікую жывёлу. Алень выбег на дарогу знянацку, і вадзіцель «Опеля» (жыхар г. п. Ушачы) не паспеў затармазіць. Паколькі хуткасны рэжым не быў перавышаны, абышлося без чалавечых ахвяр. Загінуў толькі алень, аўтамабілю патрабуецца рамонт.
У гэтым годзе на тэрыторыі раёна зарэгістравана 14 ДТЗ з казулямі, ласямі і аленямі. Як правіла, у такіх выпадках не разглядалася парушэнне вадзіцеля за рулём, бо паводзіны жывёлы непрадказальныя.
«Лясныя жыхары могуць з’явіцца ў любы час і на любым участку дарогі. Таму вадзіцелям трэба быць вельмі асцярожнымі, уважлівымі і не перавышаць устаноўленыя на аўтатрасах хуткасці руху, – раіць старшы дзяржаўтаінспектар ДАІ РАУС Віктар Бурлакоў. – А калі вы едзеце на аўтамабілі і перад вамі з’явіліся казулі ці ласі, то не варта падаваць гукавыя сігналы – гэта выклікае стрэс у жывёлы, і яна можа весці сябе непрадказальна. Любыя рэзкія паскарэнні, моцныя гукі, тармажэнні павялічваюць верагоднасць таго, што жывёла можа трапіць пад машыну. Таксама не варта выходзіць з аўтамабіля і адганяць казулю ці лася. Гэта небяспечна і дарэмная трата часу. Калі жывёла задумала перайсці аўтатрасу на канкрэтным участку, то яна гэта зробіць. Калі не зараз, то праз пяць хвілін, як вы яе адагналі, стане перабягаць дарогу, і трапіць пад колы наступнага транспартнага сродку. Лепш за ўсё пачакаць, пакуль яна пяройдзе трасу, і толькі тады працягваць рух далей. Як паказваюць даследаванні, максімальная хуткасць, якой можа абмежавацца вадзіцель на небяспечным участку – 70 кіламетраў у гадзіну. Але гэта пры ўмове, што ў яго спраўны аўтамабіль і добрыя тармазы. Калі аўтамабіль рухаецца ў цёмны час сутак, то акрамя дальняга святла, трэба ўключыць супрацьтуманныя фары, якія добра захопліваюць абочыну – гэта павысіць верагоднасць заўважыць жывёлу, якая выбягае з лесу».
А калі ДТЗ ужо здарылася? Калі аўтамабіль сутыкнуўся з дзікай жывёлай, то ні ў якім разе нельга з’язджаць з месца здарэння, папярэджваюць супрацоўнікі ДАІ. Інакш вадзіцель рызыкуе атрымаць штраф ад 5 да 25 БВ і пазбавіцца вадзіцельскіх правоў да двух гадоў. Пры ДТЗ трэба прыпыніцца, уключыць аварыйную светлавую сігналізацыю, выставіць знак аварыйнага прыпынку, каб папярэдзіць іншых вадзіцеляў аб небяспецы. Пасля гэтага пра здарэнне трэба паведаміць у міліцыю па тэл. 102.
Людміла ЗУЙКОВА.
