Пра здарэнні ў раёне расказаў в. а. намесніка начальніка РАУС Павел Трафімаў.
За мінулы тыдзень у аператыўна-дзяжурную службу РАУС паступіла 70 заяў і паведамленняў грамадзян. Былі ўзбуджаны тры крымінальныя справы.
Выяўлена 20 адміністрацыйных правапарушэнняў, у тым ліку 5 з іх – за дамашняе насілле, тры – за дробнае хуліганства.
Міліцыянеры правялі адпрацоўку 24 асоб, якія стаяць на прафілактычных уліках.
У суд адпраўлены адзін матэрыял аб накіраванні грамадзяніна, які злоўжывае спіртнымі напіткамі, у лячэбна-працоўны прафілакторый.
Зарэгістраваны тры факты сямейнага нядобрабыту, інфармацыя накіравана ў аддзел па адукацыі райвыканкама.
У адносінах да двух сямейных дэбашыраў прыменены ахоўныя прадпісанні.
Зарэгістраваны чатыры дарожна- транспартныя здарэнні.
Супрацоўнікамі ДАІ на дарогах раёна выяўлена 90 парушэнняў правілаў дарожнага руху. Восем вадзіцеляў перавысілі ўстаноўленую хуткасць руху, 11 не прышпілілі рамень бяспекі.
Правілы дарожнага руху парушылі 7 веласіпедыстаў і 17 пешаходаў (12 з іх не пазначылі сябе святловяртальнымі элементамі ў цёмны час сутак).
Барсетка
Жыхар аг. Светласельскі звярнуўся ў раённы аддзел унутраных спраў з той нагоды, што на дваровай тэрыторыі шматкватэрнага дома ён згубіў барсетку. А ў ёй знаходзіліся 205 рублёў і 10 долараў ЗША. Агульны ўрон склаў 345 рублёў. Барсетку з грашыма нехта падабраў і не вярнуў. Супрацоўнікі крымінальнага вышуку па гарачых слядах устанавілі, што зрабіла гэта мясцовая жыхарка. Па дадзеным факце ўзбуджана крымінальная справа. Максімальнае пакаранне, што пагражае ліхадзейцы, – пазбаўленне волі да трох гадоў.
Людміла ЗУЙКОВА.
