Пяць простых «НЕ», каб не стаць ахвярай
З 19 па 25 студзеня ў Віцебскай вобласці праходзіць прафілактычная акцыя «Тыдзень кіберабароны», накіраваная на папярэджанне кіберзлачынстваў.
З мабільнымі тэлефонамі, камп’ютарамі, сэрвісамі і банкаўскімі плацежнымі карткамі наша жыццё больш камфортнае, але ж неабароненае ад махляроў. З пачатку года ў раёне зарэгістравана адно кіберзлачынства (сума прычыненага ўрону склала 620 рублёў). У сямі выпадках было вынесена рашэнне аб адмове ва ўзбуджэнні крымінальных спраў, бо да бяды не дайшло – людзі не паспелі адправіць махлярам грошы.
На Віцебшчыне з 7 па 15 студзеня 11 грамадзян звярнуліся ў праваахоўныя органы па фактах здзяйснення ў адносінах да іх цяжкіх кіберзлачынстваў. Сума прычыненага ўрону склала больш за 150 тысяч рублёў.
«Махляры ў інтэрнэт-месенджарах прымяняюць кожны раз новыя схемы падману. Трэба быць максімальна асцярожнымі і вучыцца на чужых памылках, – папярэджвае жыхароў раёна оперупаўнаважаны крымінальнага вышуку РАУС Максім Васільеў. – Самае галоўнае, што павінна насцярожваць пры тэлефонным званку – просьба незнаёмых людзей прадаставіць канфідэнцыяльную інфармацыю, нумары банкаўскіх картак, логіны і паролі. Гэта асноўная прыкмета таго, што вы зацікавілі злачынцу і ён ні перад чым не прыпыніцца, пакуль не выманіць у вас грошы».
Пяць НЕ, якія трэба запомніць:
- НЕ паведамляйце нікому свае пашпартныя дадзеныя, логіны, паролі.
- НЕ рэагуйце на паведамленні ад невядомага адпраўшчыка. Хутчэй за ўсё гэта махляры.
- Ніколі НЕ тэлефануюць на вайбер прадстаўнікі сілавых структур, банкаў, мабільных аператараў.
- НЕ пераходзьце па падазроных спасылках.
- НЕ трымайце на картцы для анлайн-пакупак вялікія сумы грошай.
Людміла ЗУЙКОВА.
