Лодкі пад кантролем
Маламерныя судны: вынікі года, новыя правілы і важныя напаміны
У 2025 годзе супрацоўнікі Дзяржаўнай інспекцыі па маламерных суднах Віцебскай вобласці правялі вялікую работу: ажыццявілі амаль шэсць тысяч адміністрацыйных працэдур – ад рэгістрацыі лодак да тэхаглядаў – і больш за пяцьсот рэйдаў на вадаёмах. Праверкі выявілі 885 парушэнняў.
Самыя распаўсюджаныя – несвоечасовая рэгістрацыя суднаў. 148 уладальнікаў звярнуліся ў інспекцыю пазней чым праз 30 дзён пасля пакупкі лодкі. 16 чалавек атрымалі штрафы. Астатнія 721 парушэнне – гэта ігнараванне правілаў бяспекі на вадзе.
На жаль, парушэнні прывялі і да трагедый. У Віцебскім і Ушацкім раёнах у мінулым годзе загінулі два чалавекі. Прычыны тыповыя і небяспечныя: кіраванне лодкай у стане алкагольнага ап’янення і адсутнасць выратавальных камізэлек.
Што змянілася ў заканадаўстве
З 1 студзеня 2026 года ўступіла ў сілу пастанова Савета Міністраў № 731, якая абнавіла адразу некалькі дакументаў, што рэгулююць эксплуатацыю маламерных суднаў. Асноўныя змены закранулі Правілы карыстання маламернымі суднамі – іх варта абавязкова вывучыць перад новым сезонам.
Галоўныя новаўвядзенні
- Абавязкі суднаўладальнікаў пры перадачы лодкі ў арэнду або карыстанне. Лодка павінна быць тэхнічна спраўнай, мець поўны камплект неабходнага абсталявання, суднавы білет і сертыфікат аб допуску да эксплуатацыі. Гэта асабліва актуальна для тых, хто здае жыллё адпачывальнікам ра зам з лодкай.
- Адказнасць суднавадзіцеля за пасажыраў. Кіраванне лодкай, калі на ёй або на буксіруемых сродках (водныя лыжы, «бананы», кругі, вейкборды, парашуты) знаходзяцца людзі без зашпіленых выратавальных камізэлек, цяпер караецца. Камізэлька абавязковая і для самога суднавадзіцеля.
- Дадатковае назіранне пры буксіроўцы. Калі лодка буксіруе водныя атракцыёны, акрамя суднавадзіцеля на борце павінна быць яшчэ адна дарослая асоба, якая сочыць за бяспекай людзей на буксіруемых сродках.
- Новая забарона. Дзецям да 7 гадоў нельга знаходзіцца на маламерным судне без суправаджэння паўналетняга. Пры гэтым суднавадзіцель не лічыцца суправаджальным.
Падрабязна азнаёміцца з усімі патрабаваннямі можна на афіцыйным сайце ДІМС у раздзеле «заканадаўства».
Падрыхтавана па інфармацыі Дзяржаўнай інспекцыі па маламерных суднах Віцебскай вобласці.
